আজি দিল্লীলৈ উৰা মাৰিলে ৰাজ্যৰ মুখ্যমন্ত্ৰী হিমন্ত বিশ্ব শৰ্মা। দীৰ্ঘদিনীয়া অসম-মেঘালয় সীমা বিবাদ মীমাংসা সন্দৰ্ভত কেন্দ্ৰীয় গৃহমন্ত্ৰীক সাক্ষাত কৰি সহমতৰ প্ৰস্তাৱ আগবঢ়াব মুখ্যমন্ত্ৰীগৰাকীয়ে। অসমৰ মুখ্যমন্ত্রী ড০ হিমন্ত বিশ্ব শর্মা আৰু মেঘালয়ৰ মুখ্যমন্ত্রী কনৰাড চাংমাই কেন্দ্রীয় গৃহমন্ত্রী অমিত শ্বাহক সীমা সমস্যা নিষ্পত্তিৰ ক্ষেত্রত তেওঁলোকৰ আগ্রহৰ বিষয়ে অৱগত কৰিব৷ উল্লেখ্য যে চুবুৰীয়া ৰাজ্য মেঘালয়ৰে চলি অহা সীমা বিবাদ নিষ্পত্তি সম্পর্কত কালি কইনাধৰাস্থিত ৰাজ্যিক অতিথিশালাত মুখ্যমন্ত্রী ড০ হিমন্ত বিশ্ব শর্মাৰ অধ্যক্ষতাত এখন সর্বদলীয় বৈঠক অনুষ্ঠিত হয়৷ অসম বিধানসভাৰ প্রতিটো ৰাজনৈতিক দলৰ প্রতিনিধিৰ উপস্থিতিত অনুষ্ঠিত এই বৈঠকতে ৰাজ্য চৰকাৰৰ পদক্ষেপক প্রতিটো দলে আদৰণি জনায়৷ সীমা বিবাদক কেন্দ্র কৰি দুয়োখন ৰাজ্যই তিনিজনকৈ কেবিনেট মন্ত্রীৰ নেতৃত্বত গঠন কৰি দিছিল তিনিখন কমিটী৷ এই তিনিওখন কমিটীয়ে বিবদমান স্থানসমূহ পৰিদর্শন কৰি একোখনকৈ প্রতিবেদন দাখিল কৰিছিল৷ অসম চৰকাৰৰ হৈ মন্ত্রী চন্দ্রমোহন পাটোৱাৰী, অতুল বৰা আৰু পীয়ূষ হাজৰিকাই দাখিল কৰা এই প্রতিবেদন মেঘালয় চৰকাৰক ইতিমধ্যে প্রদান কৰা হৈছে৷ একেদৰে মেঘালয় চৰকাৰেও গঠন কৰা তিনিখন কমিটীৰ প্রতিবেদন অসম চৰকাৰক দাখিল কৰা হৈছিল৷ এই প্রতিবেদনৰ ভিত্তিতেই ১২টা স্থানৰ ভিতৰত ৬টা বিবদমান স্থানৰ সীমা নির্ধাৰণ কৰাৰ লক্ষ্যৰে দুয়োখন ৰাজ্যই ঐকমত্যত উপনীত হৈছে৷ অসমে মেঘালয়ৰ পৰা ১৮.৫১ বর্গকিলোমিটাৰ ভূমি লাভ কৰাৰ বিপৰীতে মেঘালয়ক অসমে এৰি দিব ১৮.২৯ বর্গকিলোমিটাৰ ভূমি৷ আজিৰ ৰাজ্যিক কেবিনেটত এই বিষয়টো অনুমোদন হোৱাৰ লগে লগে ৬ স্থানৰ সীমা বিবাদ নিষ্পত্তিৰ দিশে অগ্রসৰ হোৱাটো স্পষ্ট হৈ পৰিছে৷ ইফালে মেঘালয়ৰ মুখ্যমন্ত্রী কনৰাড চাংমাই টুইটাৰত উল্লেখ কৰা অনুসৰি মেঘালয় চৰকাৰৰ কেবিনেটে অসমৰে ৬ স্থানক লৈ থকা সীমা বিবাদ নিষ্পত্তিৰ ক্ষেত্রত তিনি আঞ্চলিক কমিটীয়ে দিয়া পৰামর্শাৱলীত অনুমোদন জনায়৷ আজি দুয়ো ৰাজ্যৰ মুখ্যমন্ত্রীয়ে এই বিষয়ে কেন্দ্রীয় গৃহমন্ত্রী অমিত শ্বাহক অৱগত কৰিব৷
