জনপ্ৰিয়তাৰ তৃতীয় স্থানত ড০ হিমন্ত বিশ্ব শর্মা

অসমৰ মুখ্যমন্ত্রী ড০ হিমন্ত বিশ্ব শর্মাই দেশৰ অতি জনপ্রিয় মুখ্যমন্ত্রীৰ তালিকাত স্থান নিশ্চিত কৰিছে৷ আনকি অসমত মুখ্যমন্ত্রী ড০ শর্মাৰ জনপ্রিয়তা প্রধানমন্ত্রী নৰেন্দ্র মোদীতকৈ অধিক৷ শেহতীয়াকৈ প্রকাশ পোৱা এক জৰীপত অসমৰ মুখ্যমন্ত্রীজনৰ এই জনপ্রিয়তা প্রকাশ পাইছে৷ অর্মেক্স মিডিয়া নামৰ এক সংস্থাই সময়ে সময়ে কৰি থকা জৰীপত দেশৰ অতি জনপ্রিয় মুখ্যমন্ত্রীৰ তালিকাৰ পৰা বিশ্বৰ জনপ্রিয় প্রধানমন্ত্রীসকলৰ তালিকা প্রকাশ কৰি থাকে৷
শেহতীয়াকৈ প্রকাশ পোৱা জৰীপত দেশৰ তৃতীয় জনপ্রিয় মুখ্যমন্ত্রী হিচাপে স্থান লাভ কৰিছে অসমৰ মুখ্যমন্ত্রীজনে৷ মাত্র এটা মাহতে মুখ্যমন্ত্রী ড০ শর্মাই জনপ্রিয়তাৰ দৌৰত এটা স্থান উন্নীত হৈছে৷ উল্লেখযোগ্য যে শেহতীয়াকৈ প্রকাশ পোৱা জৰীপ অনুসৰি যোৱা ডিচেম্বৰ মাহত অসমৰ মুখ্যমন্ত্রী ড০ হিমন্ত বিশ্ব শর্মা দেশৰ তৃতীয় অত্যন্ত জনপ্রিয় মুখ্যমন্ত্রী হিচাপে পৰিগণিত হৈছে৷ দেশৰ সবাতোকৈ জনপ্রিয় মুখ্যমন্ত্রীৰ স্থান লাভ কৰিছে তামিলনাডুৰ মুখ্যমন্ত্রী এম কে ষ্টেলিনে৷
তেওঁৰ ৰেটিং আছিল ৬৭৷ দ্বিতীয় স্থানত থকা উত্তৰ প্রদেশৰ মুখ্যমন্ত্রী যোগী আদিত্য নাথৰ ৰেটিং হ’ল ৬৬ তৃতীয় স্থানত থকা অসমৰ মুখ্যমন্ত্রী ড০ হিমন্ত বিশ্ব শর্মাৰ ৰেটিং হ’ল ৬৫ আনহাতে ৬৪ ৰেটিঙেৰে চতুর্থ স্থানত পশ্চিম বংগৰ মুখ্যমন্ত্রী মমতা বেনার্জী আৰু ৫৮ ৰেটিঙেৰে কেৰালাৰ মুখ্যমন্ত্রী পিনাৰায়ী বিজয়নে পঞ্চম জনপ্রিয় মুখ্যমন্ত্রীৰ স্থান লাভ কৰিছে৷
প্রণিধানযোগ্য যে অসমৰ মুখ্যমন্ত্রী ড০ শর্মাই মাত্র এটা মাহ পূর্বে অর্থাৎ নৱেম্বৰ মাহত চতুর্থ স্থানত আছিল৷ নৱেম্বৰ মাহত তেওঁ তামিলনাডুৰ মুখ্যমন্ত্রী এম কে বিজয়ন (ৰেটিং ৬৭), ওড়িষাৰ মুখ্যমন্ত্রী নবীন পাটনায়ক (ৰেটিং ৬৩) আৰু কেৰালাৰ মুখ্যমন্ত্রী পিনাৰায়ী বিজয়নৰ (ৰেটিং ৬২) পাছতে দেশৰ সবাতোকৈ জনপ্রিয় মুখ্যমন্ত্রী হিচাপে চতুর্থ স্থান (ৰেটিং ৬০) লাভ কৰিছিল৷