পশ্চিম গুৱাহাটীৰ বিধায়ক ৰমেন্দ্ৰ নাৰায়ণ কলিতাই সমষ্টিটোৰ অন্তৰ্গত তথা গুৱাহাটী বিশ্ববিদ্যালয়ৰ পৰা কিছু নিলগৰ পূব ধাৰাপুৰৰ পৰা ব্ৰহ্মপুত্ৰৰ দাঁতিত থকা জলসম্পদ বিভাগৰ বান প্ৰতিৰোধী মথাউৰীৰ ওপৰেৰে লোকনির্মাণ পথ বিভাগৰ পশ্চিম গুৱাহাটী ক্ষেত্ৰীয় পথ সংমণ্ডলৰ জৰিয়তে প্ৰায় ১০ কিলোমিটাৰ দূৰত্বত থকা মাজিৰগাঁওলৈ এটা পকী পথ নিৰ্মাণৰ আঁচনি গ্ৰহণ কৰিছে।
লোকনির্মাণ পথ বিভাগৰ অধীনত ২০২১-২০২২ বিত্তীয় বর্ষৰ নাবাৰ্ড বেংকৰ আৰ আই ডি এফ-১৭ শিতানৰ ১৯.৮৮ কোটি টকা ব্যয় সাপেক্ষে পূৱ ধাৰাপুৰ-মাজিৰগাঁও সংযোগী ব্ৰহ্মপুত্ৰৰ পাৰেৰে যোৱা মথাউৰিটোৰ ওপৰত পকীপথ নিৰ্মাণৰ আজি আধাৰশিলা স্থাপন কৰা হয়। স্থানীয় তিনি শতাধিক ৰাইজৰ উপস্থিতিত মাংগলিক কাৰ্যসূচীৰ মাজেৰে আধাৰশিলা স্থাপন কৰে পশ্চিম গুৱাহাটী সমষ্টিৰ বিধায়ক ৰমেন্দ্ৰ নাৰায়ণ কলিতাই। আনহাতে এই উপলক্ষে অনুষ্ঠিত এখন ৰাজহুৱা সভাত মুখ্য অতিথি হিচাপে উপস্থিত থাকি বিধায়ক কলিতাই ভাষণ প্ৰসংগত কয় যে-“এই পকী পথটোৰ নিৰ্মাণ কার্য সম্পূৰ্ণ হৈ উঠিলে পশ্চিম গুৱাহাটীৰ যাতায়ত ব্যৱস্থাৰ আমূল পৰিবৰ্তন হব। মহানগৰীৰ তীব্ৰ যানজঁট পৰিহাৰ কৰি মহানগৰীৰ পশ্চিম প্ৰান্তৰ নাগৰিকে অতি সহজে অতি কম সময়তে মহানগৰীৰ ভিন্ন স্থানলৈ অহা-যোৱা কৰিব পাৰিব।”
অগপৰ কেন্দ্ৰীয় সম্পাদক সুভাষ শৰ্মাৰ সভাপতিত্বত অনুষ্ঠিত সভাখনত লোকনিৰ্মাণ পথ বিভাগৰ পশ্চিম গুৱাহাটী ক্ষেত্ৰীয় পথ সংমণ্ডলৰ কাৰ্যবাহী অভিযন্তা ভৱেন শৰ্মা, পশ্চিম গুৱাহাটী উপ সংমণ্ডলৰ সহকাৰী কাৰ্যবাহী অভিযন্তা পুলক দাস, সহকাৰী অভিযন্তা কৃষ্ণ দাস, কনিষ্ঠ অভিযন্তা অমল ডেকা, জলসম্পদ বিভাগৰ পশ্চিম গুৱাহাটী উপ সংমণ্ডলৰ সহকাৰী কাৰ্যবাহী অভিযন্তা প্ৰণৱ চেতিয়া, সহকাৰী অভিযন্তা নৰেন মালি প্ৰমুখ্যে দুয়োটা বিভাগৰ কেইবাজনো বিষয়া-কৰ্মচাৰী, কাঁহিকুছি গাওঁ পঞ্চায়তৰ সভাপতি জগন্নাথ ঠাকুৰীয়া, ৰাণী আঞ্চলিক পঞ্চায়তৰ সভাপতি পৰমেশ্বৰ বৰ্মন, পশ্চিম গুৱাহাটী বিধান পৰিষদৰ সম্পাদক ৰুবুল বৈশ্য, অগপ নেতা ৰঞ্জন পাটোৱাৰী প্ৰমুখ্যে বিষয়ববীয়া সকল উপস্থিত থাকে।সভাখনৰ আঁত ধৰে অসম যুৱ পৰিষদৰ কেন্দ্ৰীয় সম্পাদক প্ৰণৱ দাসে।