মৰমৰ দেশবাসীসকল,
নমস্কাৰ!
১. আজিৰ পৰা পাঁচ বছৰ পূৰ্বে আপোনালোক সকলোৱে মোৰ ওপৰত অপৰিসীম বিশ্বাস ৰাখি আপোনালোকৰ নিৰ্বাচিত জনপ্ৰতিনিধিৰ জৰিয়তে মোক ভাৰতৰ ৰাষ্ট্ৰপতি হিচাপে নিৰ্বাচিত কৰিছিল। আজি মোৰ কাৰ্যকাল সমাপ্ত হৈছে। এই উপলক্ষে, মই আপোনালোক সকলোৰে সৈতে কেইটামান কথা ভাগ-বতৰা কৰিব বিচাৰো।
২. সৰ্ব প্ৰথমে, মই আপোনালোক সকলো দেশবাসী আৰু আপোনাৰ জনপ্ৰতিনিধি সকলৰ প্ৰতি আন্তৰিক কৃতজ্ঞতা জ্ঞাপন কৰিছো। সমগ্ৰ দেশ ভ্ৰমণৰ সময়ত মই নাগৰিকসকলৰ সৈতে হোৱা বাৰ্তালাপ আৰু সম্পৰ্কৰ দ্বাৰা নিৰন্তৰে অনুপ্ৰাণিত হৈছিলো। সৰু সৰু গাঁৱত বাস কৰা আমাৰ কৃষক আৰু শ্ৰমিক ভাই-ভনীসকল, নতুন প্ৰজন্মৰ জীৱন অনুপ্ৰাণিত কৰা আমাৰ শিক্ষকসকল, আমাৰ ঐতিহ্যসমৃদ্ধ কৰা শিল্পীসকল, আমাৰ দেশৰ বিভিন্ন পৰিধি অধ্যয়ন কৰা পণ্ডিতসকল, দেশৰ সমৃদ্ধি বৃদ্ধি কৰা উদ্যোগীসকল, দেশবাসীলৈ সেৱা আগবঢ়োৱা চিকিৎসক আৰু নাৰ্চ, ৰাষ্ট্ৰ নিৰ্মাণত নিয়োজিত বিজ্ঞানী আৰু অভিযন্তাসকল, দেশৰ ন্যায়িক ব্যৱস্থালৈ অৱদান আগবঢ়োৱা ন্যায়াধীশ আৰু অধিবক্তাসকল, প্ৰশাসন ব্যৱস্থা সুচাৰুৰূপে পৰিচালনা কৰা অসামৰিক কৰ্মচাৰীসকল, প্ৰতিটো শাখাক উন্নয়নৰ সৈতে সংযোজিত কৰাত সক্ৰিয় আমাৰ সমাজকৰ্মীসকল, ভাৰতীয় সমাজত আধ্যাত্মিকতাৰ প্ৰবাহ বৰ্তাই ৰখা সকলো সম্প্ৰদায়ৰ আচাৰ্য আৰু গুৰুসকল, আপোনালোক সকলোৱে আপোনালোকৰ কৰ্তব্য পালনত মোৰ সৈতে সহযোগিতা কৰিছে। চমুকৈ, মই সমাজৰ সকলো শ্ৰেণীৰ পৰা সম্পূৰ্ণ সমৰ্থন, সহযোগিতা আৰু আশীৰ্বাদ লাভ কৰিছো।
৩. যিসময়ত মই আমাৰ সৈন্যবাহিনী, অৰ্ধসামৰিক বাহিনী আৰু আৰক্ষীৰ সাহসী জোৱানসকলক সাক্ষাৎ কৰিছিলো সেই সকলো মুহূৰ্ত মোৰ মনত বিশেষভাৱে খোদিত হৈ থাকিব। সেই সকলোবোৰত দেশপ্ৰেমৰ এক আশ্চৰ্যকৰ অনুভৱ আছে। মোৰ বিদেশ ভ্ৰমণৰ সময়ত যেতিয়াই মই প্ৰবাসী ভাৰতীয়সকলক সাক্ষাৎ কৰিছিলো, প্ৰতিবাৰেই মই মাতৃভূমিৰ প্ৰতি তেওঁলোকৰ গভীৰ মৰম আৰু আন্তৰিকতা অনুভৱ কৰিছিলো। দেশৰ সৰ্বোচ্চ অসামৰিক বঁটা প্ৰদান অনুষ্ঠানৰ সময়ত মই বহুতো ব্যতিক্ৰমী প্ৰতিভাক সাক্ষাৎ কৰাৰ সুযোগ পাইছিলো। তেওঁলোক সকলোৱে সম্পূৰ্ণ নিষ্ঠা, অটল সমৰ্থন আৰু দৃঢ়তাৰে এখন উন্নত ভাৰত গঢ়ি তোলাত সক্ৰিয় হৈ পৰিছে।
৪. সেইদৰে অনেক দেশবাসীক লগ পোৱাৰ পিছত মোৰ মনতএই বিশ্বাসৰ উদয় হৈছে যে আমাৰ অনুগত নাগৰিকসকলেই হৈছে প্ৰকৃত ৰাষ্ট্ৰ নিৰ্মাতা। আৰু তেওঁলোক সকলোৱে ভাৰতক উন্নত কৰি তুলিবলৈ চেষ্টা কৰি আছে। আমাৰ মহান দেশৰ ভৱিষ্যত এনে সকলো নিষ্ঠাৱান দেশবাসীৰ হাতত সুৰক্ষিত।
মৰমৰ দেশবাসীসকল,
৫. এই অভিজ্ঞতাবোৰৰ মাজেৰে যাওঁতে মই প্ৰায়ে মোৰ শৈশৱৰ কথা মনলৈ আহে যে কিমান গুৰুত্বপূৰ্ণ ঐতিহাসিক ঘটনাই আমাৰ ব্যক্তিগত জীৱনক প্ৰভাৱিত কৰি আহিছে।
৬. যেতিয়া মোৰ সৰু গাওঁখনত, এটা সাধাৰণ শিশুৰ দৃষ্টিকোণৰ পৰা জীৱনটো বুজিবলৈ চেষ্টা কৰিছিলো তেতিয়া দেশখনে স্বাধীনতা লাভ কৰাৰ মাত্ৰ কেইটামান বছৰহে হৈছিল। দেশখন পুনৰ নিৰ্মাণ কৰাৰ বাবে জনসাধাৰণৰ মাজত এক নতুন উৎসাহৰ সৃষ্টি হৈছিল; তেওঁলোকৰ চকুত নতুন সপোন আছিল। মোৰ হৃদয় আৰু মনত এটা ক্ষীণ কল্পনাই বাস কৰিছিল যে এদিন মইও মোৰ দেশৰ সৃষ্টিত অংশগ্ৰহণ কৰিবলৈ সক্ষম হ’ব পাৰোঁ। কেঁচা ঘৰত বাস কৰা পৰিয়ালৰ মোৰ দৰে সাধাৰণ শিশুৰ বাবে, আমাৰ গণৰাজ্যৰ সৰ্বোচ্চ সাংবিধানিক পদৰ বিষয়ে কোনো ধাৰণা থকাটো কল্পনাৰ ঊৰ্ধৰ আছিল। কিন্তু ভাৰতৰ গণতন্ত্ৰৰ শক্তি এয়াই যে ই প্ৰতিজন নাগৰিকৰ বাবে দেশৰ ভাগ্য গঢ়াত গুৰুত্বপূৰ্ণ ভূমিকা পালন কৰাৰ পথ মুকলি কৰি দিছে। কানপুৰ দেহাট জিলাৰ পাৰাউংখ গাঁৱৰ এটা অতি সাধাৰণ পৰিয়ালত ডাঙৰ দীঘল হোৱা ৰামনাথ কোবিন্দে আজি আপোনালোক সকলো দেশবাসীক সম্বোধন কৰি আছে, যাৰ বাবে মই আমাৰ দেশৰ জীৱন্ত গণতান্ত্ৰিক ব্যৱস্থাৰ শক্তিৰ ওচৰত কোটি-কোটি প্ৰণাম জনাইছো।
৭. যিহেতু মই মোৰ গাওঁখনৰ কথা উল্লেখ কৰিছো, মই এইটোও উল্লেখ কৰিব বিচাৰো যে ৰাষ্ট্ৰপতিৰ কাৰ্যকালত মোৰ জন্মভূমিলৈ যোৱা আৰু মোৰ কানপুৰ বিদ্যালয়ৰ প্ৰবীণ শিক্ষকসকলৰ চৰণ স্পৰ্শ কৰি তেওঁলোকৰ আশীৰ্বাদ লোৱাটো সদায় মোৰ জীৱনৰ আটাইতকৈ স্মৰণীয় মুহূৰ্তবোৰৰ ভিতৰত অন্যতম হৈ থাকিব। এই বছৰ প্ৰধানমন্ত্ৰীও মোৰ গাঁও পাৰাউংখলৈ আহিছিল আৰু মোৰ গাওঁখনৰ সন্মান বৃদ্ধি কৰিছিল। নিজৰ শিপাৰ সৈতে সংযুক্ত হৈ থকাটো ভাৰতীয় সংস্কৃতিৰ এটা বিশেষত্ব। মই যুৱ প্ৰজন্মক তেওঁলোকৰ গাঁও বা চহৰ আৰু তেওঁলোকৰ বিদ্যালয় আৰু শিক্ষকসকলৰ সৈতে সংযুক্ত হৈ থকাৰ এই পৰম্পৰাটো আগবঢ়াই নিবলৈ অনুৰোধ কৰিম।
মৰমৰদেশবাসীসকল,
৮. আজিকালি সকলো দেশবাসীয়ে ‘আজাদী কা অমৃত মহোৎসৱ’ উদযাপন কৰি আছে। অহা মাহত আমি সকলোৱে ভাৰতৰ স্বাধীনতাৰ ৭৫তম বাৰ্ষিকী উদযাপন কৰিম। আমি ২৫বছৰ ম্যাদৰ সেই ‘অমৃত কাল’ত প্ৰৱেশ কৰিম যি স্বাধীনতাৰ শতবাৰ্ষিকী বৰ্ষত অৰ্থাৎ ২০৪৭ত সম্পূৰ্ণ হ’ব। এই বিশেষ ঐতিহাসিক বছৰবোৰ আমাৰ গণৰাজ্যৰ প্ৰগতিৰ পথত মাইলৰ খুঁটিৰ দৰে হ’ব। আমাৰ গণতন্ত্ৰৰ এই উন্নয়ন যাত্ৰা হৈছে দেশৰ সোণালী সম্ভাৱনা প্ৰক্ষেপিত কৰি বিশ্ব সম্প্ৰদায়ৰ বাবে এক উন্নত ভাৰত উপস্থাপন কৰাৰ এক যাত্ৰা।
৯. আধুনিক সময়ত, আমাৰ দেশৰ এই গৌৰৱময় যাত্ৰা ব্ৰিটিছ শাসনকালত জাতীয়তাবাদী অনুভূতি জাগৰণ আৰু স্বাধীনতা সংগ্ৰামৰ সৈতে আৰম্ভ হৈছিল। ঊনবিংশ শতিকাত সমগ্ৰ দেশতে দাসত্বৰ বিৰুদ্ধে বহুতো বিদ্ৰোহ হৈছিল। দেশবাসীৰ মাজত নতুন আশা জগাইতোলা এনে বিদ্ৰোহৰ বেছিভাগ নায়কৰ নাম পাহৰি যোৱাহৈছিল। এতিয়া তেওঁলোকৰ বীৰত্বপূৰ্ণ কাহিনীবোৰ সন্মানৰ সৈতে স্মৰণ কৰা হৈছে। ঊনবিংশ আৰু বিংশ শতিকাৰ আৰম্ভণিৰ শেষৰ বৰ্ষবোৰত নতুন জনসচেতনতা সঞ্চাৰিত হৈছিল আৰু স্বাধীনতা সংগ্ৰামৰ বহুতো ধাৰা প্ৰবাহিত হৈছিল।
১০. যেতিয়া গান্ধীজী ১৯১৫চনত স্বদেশলৈ উভতি আহিছিল দেশত জাতীয়তাবাদৰ অনুভূতি প্ৰবল হৈ উঠিছিল। বিংশ শতিকাৰ আৰম্ভণিৰ দশকবোৰত আমাৰ দেশখনে বহুতো মহান লোক নায়কৰ উজ্জ্বল আকাশী-গংগাৰ পোহৰলাভ কৰিছিলযি বিশ্ব ইতিহাসত অতুলনীয়। এফালে আধুনিক যুগৰ ‘ঋষি’ৰ দৰে গুৰুদেৱ ৰবীন্দ্ৰনাথ ঠাকুৰে দেশবাসীক আমাৰ সাংস্কৃতিক ঐতিহ্যৰ সৈতে পুনৰ সংযোগ কৰি আছিল, আনহাতে, বাবাচাহেব ভীমৰাও আম্বেদকাৰে সমতাৰ আদৰ্শক শক্তিশালী ভাৱে উত্থাপন কৰিছিল যাক অধিকাংশ উন্নত দেশত দেখা নগৈছিল। তিলক আৰু গোখলেৰ পৰা ভগৎ সিং আৰু নেতাজী সুভাষ চন্দ্ৰ বসুলৈকে; জৱাহৰলাল নেহৰু, চৰ্দাৰ পেটেল আৰু শ্যামা প্ৰসাদ মুখাৰ্জীৰ পৰা সৰোজিনী নাইডু আৰু কমলাদেৱী চট্টোপাধ্যায়লৈকে – মানৱতাৰ ইতিহাসত কেৱল এটা লক্ষ্যক লৈ কেৱল ইমানবোৰ ব্যক্তিত্বৰ তৎপৰতাক’তো দেখা পোৱা নাই।
১১. মোৰ মন-মগজুলৈ আৰু অনেক ব্যক্তিত্বৰ নাম আহিছে, কিন্তু মই ক’ব বিচাৰিছো যে স্বাধীন ভাৰতৰ বিভিন্ন দৃষ্টিভংগী সম্পন্ন বহুতো মহান নেতাই ভাৰতৰ স্বাধীনতাৰ বাবে ত্যাগ আৰু বলিদানৰ আশ্চৰ্যজনক উদাহৰণ দাঙি কৰিছে। ইয়াত কোনো সন্দেহ নাই যে গান্ধীজীৰ পৰিৱৰ্তনশীল ধাৰণাই স্বাধীনতা সংগ্ৰামৰ ওপৰত সৰ্বাধিক প্ৰভাৱ পেলাইছিল আৰু সেই সময়ছোৱাত তেওঁ দেশবাসীৰ জীৱন ধাৰাক এক নতুন দিশ প্ৰদান কৰিছিল।
ভদ্ৰপুৰুষ তথা ভদ্ৰমহিলাসকল,
১২. আমি আজি গণতন্ত্ৰৰ যি পথত আগবাঢ়িছো সেই পথ আমাৰ সংবিধান সভাই নিৰ্ধাৰণ কৰিছিল। সেই সভাত সমগ্ৰ দেশক প্ৰতিনিধিত্ব কৰা বহুতো বিশিষ্ট ব্যক্তিৰ ভিতৰত আছিল হংসাবেন মেহতা, দুৰ্গাবাই দেশমুখ, ৰাজকুমাৰী অমৃত কৌৰ আৰু সুচেতা কৃপলানি সহিতে আৰু ১৫ গৰাকী মহিলা। সংবিধান সভাৰ সদস্যসকলৰ অমূল্য অৱদানেৰে প্ৰস্তুত কৰা ভাৰতৰ সংবিধান হৈছে আমাৰ প্ৰকাশগৃহ আৰু ইয়াত সন্নিবিষ্ট আদৰ্শবোৰ দীৰ্ঘদিন ধৰি ভাৰতীয় জীৱন-মূল্যবোধৰ অংশ হৈ আহিছে।
১৩. সংবিধান গৃহীত হোৱাৰ এদিন আগতে সংবিধান সভাত ড০ আম্বেদকাৰে তেওঁৰ সামৰণি বিবৃতিত গণতন্ত্ৰৰ সামাজিক আৰু ৰাজনৈতিক মাত্ৰাৰ মাজৰ পাৰ্থক্য স্পষ্ট কৰিছিল। তেওঁ কৈছিল যে আমি কেৱল ৰাজনৈতিক গণতন্ত্ৰত সন্তুষ্ট হোৱা উচিত নহয়। মই তেওঁৰ বক্তব্য আপোনালোক সকলোৰে সৈতে ভাগ বতৰা কৰিবলৈ ওলাইছো।তেওঁ কৈছিল, “আমি আমাৰ ৰাজনৈতিক গণতন্ত্ৰকো সামাজিক গণতন্ত্ৰ হিচাপে গঢ়ি তোলা উচিত। ৰাজনৈতিক গণতন্ত্ৰ সামাজিক গণতন্ত্ৰৰ ওপৰত আধাৰিত নহ’লে জীয়াই থাকিব নোৱাৰে। সামাজিক গণতন্ত্ৰৰ অৰ্থ কি? ইয়াৰ অৰ্থ হৈছে জীৱনৰ পথ যি স্বাধীনতা, সমতা আৰু ভ্ৰাতৃত্বক জীৱনৰ নীতি হিচাপে স্বীকৃতি দিয়ে। স্বাধীনতা, সমতা আৰু ভ্ৰাতৃত্বৰ এই নীতিবোৰকএটা ত্ৰিমূৰ্তিৰ পৃথক অংশ হিচাপে প্ৰত্যক্ষকৰা উচিত নহয়। এই ত্ৰিমূৰ্তিৰ প্ৰকৃত অৰ্থ হ’ল যে ত্ৰিমূৰ্তিৰ যিকোনোএটা অংশ আনটোৰ পৰা পৃথক কৰিলে গণতন্ত্ৰৰ প্ৰকৃত উদ্দেশ্য সমাপ্ত হয়।”
মৰমৰদেশবাসীসকল,
১৪. জীৱনৰ মূল্যবোধৰ এই ত্ৰিমূৰ্তি আদৰ্শ-সমৃদ্ধ, উদাৰ আৰু অনুপ্ৰেৰণাদায়ক। এই ত্ৰিমূৰ্তিক এক বিমূৰ্ত ধাৰণা বুলি ভবাটো ভুল হ’ব। কেৱল আধুনিকেই নহয়, আমাৰ প্ৰাচীন ইতিহাসো এই সত্যৰ সাক্ষী যে এই তিনিটা জীৱন-মূল্যবোধ হ’ল আমাৰ জীৱনৰ সত্য; সেইবোৰ প্ৰাপ্ত কৰিব পাৰি, আৰু দৰাচলতে, সেইবোৰ বিভিন্ন যুগত প্ৰাপ্ত কৰাও হৈছে। আমাৰ পূৰ্বপুৰুষ আৰু আমাৰ আধুনিক ৰাষ্ট্ৰ নিৰ্মাতাসকলে তেওঁলোকৰ কঠোৰ পৰিশ্ৰম আৰু সেৱাৰ মনোভাৱৰ জৰিয়তে ন্যায়, স্বাধীনতা, সমতা আৰু ভ্ৰাতৃত্বৰ আদৰ্শঅনুসৰণ কৰিছিল। আমি মাত্ৰ তেওঁলোকৰ পদাংক অনুসৰণ কৰিব লাগিব আৰু আগবাঢ়ি যাব লাগিব।
মৰমৰ দেশবাসীসকল,
১৫. প্ৰশ্ন উত্থাপিত হয় যে আজিৰ পৰিপ্ৰেক্ষিতত এজন সাধাৰণ নাগৰিকৰ বাবে এনে আদৰ্শৰ অৰ্থ কি? মই বিশ্বাস কৰোঁ যে সেই আদৰ্শবোৰৰ মূল লক্ষ্য হৈছে সাধাৰণ মানুহৰ বাবে সুখী জীৱনৰ পথ প্ৰশস্ত কৰা। ইয়াৰ বাবে, প্ৰথমতে সাধাৰণ লোকসকলৰ মৌলিক প্ৰয়োজনীয়তা পূৰণ কৰিব লাগিব। এতিয়া আৰু সম্পদৰ কোনো অভাৱ নাই। প্ৰতিটো পৰিয়ালৰ উন্নত আৱাসৰ সুবিধা থাকিব লাগেআৰু খোৱা পানী তথা বিদ্যুতৰ সুবিধা থাকিব লাগে – আমি এই দিশত কাম কৰি আছো। এই পৰিৱৰ্তন কেৱল উন্নয়ন আৰু সুশাসনৰ বৰ্ধিত গতিৰ জৰিয়তেহে সম্ভৱ হৈছে যি বৈষম্যৰ পৰা সম্পূৰ্ণৰূপে মুক্ত।
১৬. প্ৰাথমিক প্ৰয়োজনীয়তাবোৰ প্ৰদান কৰাৰ পিছত, এয়া নিশ্চিত কৰিব লাগে যাতে প্ৰতিজন নাগৰিকে সুখৰ অৱকাশ বিচাৰিবলৈ নিজৰ সামৰ্থ্য ব্যৱহাৰ কৰে আৰু তেওঁৰ ব্যক্তিগত গুণাগুণৰ সঠিক ব্যৱহাৰ কৰি নিজৰ ভাগ্য গঢ়ি তোলে। শিক্ষা হৈছে এই দিশত আগবাঢ়ি যোৱাৰ মুখ্য উপায়। মই বিশ্বাস কৰোঁ যে ‘ৰাষ্ট্ৰীয় শিক্ষা নীতি’ যুৱ ভাৰতীয়সকলৰ বাবে তেওঁলোকৰ ঐতিহ্যৰ সৈতে সংযোগ স্থাপন কৰাত আৰু একবিংশ শতিকাত আগবাঢ়ি যোৱাত যথেষ্ট সহায়ক হ’ব। তেওঁলোকৰ বিকাশশীল ভৱিষ্যতৰ বাবে উন্নত স্বাস্থ্য সেৱা অপৰিহাৰ্য। ক’ভিড বিশ্বব্যাপী মহামাৰীয়ে ৰাজহুৱা স্বাস্থ্যসেৱা আন্তঃগাঁথনিৰ অধিক উন্নতিৰ প্ৰয়োজনীয়তাৰ ওপৰত গুৰুত্ব আৰোপ কৰিছে। মই সুখী যে চৰকাৰে এই কামত সৰ্বাধিক অগ্ৰাধিকাৰ দিছে। শিক্ষা আৰু স্বাস্থ্য সেৱাৰ সুবিধা লৈআমাৰ দেশবাসী সক্ষম হ’ব পাৰে আৰু অৰ্থনৈতিক সংস্কাৰৰ সুবিধা লৈ তেওঁলোকৰ জীৱন গঢ়ি তোলাৰ সৰ্বশ্ৰেষ্ঠ পথ গ্ৰহণকৰিব পাৰে। আমাৰ দেশখনে একবিংশ শতিকাক ভাৰতৰ শতিকা হিচাপে গঢ়ি তুলিবলৈ সক্ষম হৈছে, সেয়া মোৰ দৃঢ় বিশ্বাস।
মৰমৰ দেশবাসীসকল,
১৭. মোৰ কাৰ্যকালৰ পাঁচ বছৰতমই মোৰ সামৰ্থ্যৰে মোৰ দায়বদ্ধতা পালন কৰিছো। ড০ ৰাজেন্দ্ৰ প্ৰসাদ, ড০ এছ ৰাধাকৃষ্ণণ আৰু ড০ এ পি জে আব্দুল কালামৰ দৰে মহান ব্যক্তিত্বৰ উত্তৰাধিকাৰী হোৱাৰ সুবাদত মই যথেষ্ট সচেতন হৈ আছোঁ। যেতিয়া মই ৰাষ্ট্ৰপতি ভৱনত প্ৰৱেশ কৰিছিলো, মোৰ তেতিয়াৰ পূৰ্বসূৰী শ্ৰী প্ৰণৱ মুখাৰ্জীয়েও মোক মোৰ কৰ্তব্যৰ বিষয়ে জ্ঞানসমৃদ্ধ পৰামৰ্শ দিছিল। অৱশ্যে যেতিয়াই মোৰ মনত কোনো ধৰণৰ সন্দেহৰ উদ্ৰেক হৈছিল, মই গান্ধীজীৰ পৰামৰ্শৰ মৌলিক মন্ত্ৰৰ আশ্ৰয় লৈছিলো। গান্ধীজীৰ পৰামৰ্শ অনুসৰি, সৰ্বশ্ৰেষ্ঠ নিৰ্দেশক নীতিটো আছিল যে আমি আটাইতকৈ দৰিদ্ৰ মানুহজনৰ মুখখন মনত ৰাখি নিজকে প্ৰশ্ন কৰা উচিত, আমি গ্ৰহণ কৰা পদক্ষেপটো সেই দৰিদ্ৰ লোকজনৰ বাবে সহায়ক হ’বনে? গান্ধীজীৰ নীতিসমূহৰ ওপৰত মোৰ অটল বিশ্বাসৰ কথা দোহাৰি মই আপোনালোক সকলোকে প্ৰতিদিনে, কেইমিনিট মানৰ বাবে গান্ধীজীৰ জীৱন আৰু শিক্ষাৰ বিষয়ে চিন্তা কৰিবলৈ অনুৰোধ কৰিম।
মৰমৰ দেশবাসীসকল,
১৮. আমাৰ সকলোৰে বাবে মাতৃৰ দৰে পূজ্য প্ৰকৃতিও গভীৰ বেদনাৰ মাজেৰে অতিক্ৰম কৰি আছে। জলবায়ু পৰিৱৰ্তনৰ সংকটে আমাৰ পৃথিৱীৰ ভৱিষ্যতৰ বাবে এক গুৰুতৰ ভাবুকিৰ সৃষ্টি কৰিছে। আমি আমাৰ সন্তানৰ বাবে আমাৰ পৰিৱেশ, আমাৰ ভূমি, বায়ু আৰু পানী সুৰক্ষিত কৰিব লাগিব। আমাৰ দৈনন্দিন ৰুটিনত আৰু দৈনন্দিন সামগ্ৰী ব্যৱহাৰ কৰোঁতেআমাৰ গছ, নদী, সাগৰ আৰু পৰ্বতৰ লগতে আন সকলো জীৱ-জন্তুৰ সুৰক্ষাৰ বাবে অতি সাৱধান হোৱাটো প্ৰয়োজন। এজন প্ৰথম নাগৰিক হিচাপে যদি মোৰ দেশবাসীক এটা পৰামৰ্শ দিব লগা হয়, তেন্তে মই সেইটোৱেই পৰামৰ্শ দিম।
১৯. মোৰ বক্তব্যৰ সামৰণি মাৰি মই পুনৰ এবাৰ সকলো দেশবাসীৰ প্ৰতি আন্তৰিক কৃতজ্ঞতা জ্ঞাপন কৰিছো। ভাৰত মাতৃক অভিবাদন জনাই মই আপোনালোক সকলোৰে এক উজ্জ্বল ভৱিষ্যতৰ কামনা কৰিছো।
ধন্যবাদ,
জয়হিন্দ !
