আজি বিজেপিৰ ৰাষ্ট্ৰীয় সভাপতি জগত প্ৰকাশ নাড্ডা এক বিশেষ কাৰ্যসূচী লৈ অসমত উপস্থিত হবহি। জানিব পৰা মতে, বিয়লি ৪ বজাত বৰঝাৰস্থিত গুৱাহাটীৰ লোকপ্ৰিয় গোপীনাথ বৰদলৈ আন্তৰ্জাতিক বিমান বন্দৰত উপস্থিত হৈ তেওঁ পোনে পোনে শক্তিপীঠ কামাখ্যা দেৱালয়লৈ যাত্ৰা কৰিব। মা কামাখ্যাৰ আশীৰ্বাদ গ্ৰহণৰ পাছতেই তেখেতে উজানবজাৰলৈ যাব। বিয়লি ৪ বাজি ৩০ মিনিটত তেখেতে উজানবজাৰস্থিত বিজেপি উত্তৰ-পূৱ কাৰ্যালয় “পদ্ম ভৱন”ৰ শুভাৰম্ভণি কৰিব।
উল্লেখ্য যে, এই শুভাৰম্ভণি অনুষ্ঠানত উত্তৰ-পূৰ্বাঞ্চলৰ তিনিগৰাকী কেন্দ্ৰীয় মন্ত্ৰী আৰু চাৰিগৰাকী মুখ্যমন্ত্ৰীৰ লগতে ৮ গৰাকী জিলা সভাপতিকে ধৰি বিজেপি দলৰ কেন্দ্ৰীয় আৰু ৰাজ্যিক নেতৃত্ব উপস্থিত থাকিব বুলি জানিব পৰা গৈছে ৷ ইয়াৰোপৰি, পদ্ম ভৱনৰ শুভাৰম্ভণিৰ লগত সংগতি ৰাখি ৰাষ্ট্ৰীয় সভাপতিজনে বিয়লি ৫ বজাত মাছখোৱাস্থিত প্ৰাগজ্যোতিষ সাংস্কৃতিক প্ৰকল্পত এখন কাৰ্যকৰ্তাৰ সভাও সম্বোধন কৰিব।
