নিজতকৈও আগতেই একমাত্ৰ পুত্ৰৰ মৃত্যু কামনা কৰি ভগৱন্তৰ ওচৰত মাতৃয়ে প্ৰাৰ্থনা জনোৱা ব্যতিক্ৰমী দৃশ্যপটেৰে পৰিবহণ বিভাগে চলোৱা পথ সুৰক্ষাৰ সজাগতা অভিযানে চানমাৰীত চলি থকা অসম গ্ৰন্থমেলাত সমবেত যুৱপ্ৰজন্মকে ধৰি প্ৰায় সকলো লোককে আকৰ্ষণ কৰিছে ৷ উল্লেখ্য যে, মুখ্যমন্ত্ৰী ড° হিমন্ত বিশ্ব শৰ্মাই ৰাজ্যত পথ-দুৰ্ঘটনা আৰু দুৰ্ঘটনাজনিত মৃত্যু ৰোধৰ বাবে সৰ্বস্তৰৰ ৰাইজৰ সহযোগিতা বিচাৰি ব্যাপক জনসচেতনতাৰ বাবে জনোৱা আহ্বানত পৰিবহণ মন্ত্ৰী চন্দ্ৰমোহন পাটোৱাৰীয়ে পৰিবহণ বিভাগক এইক্ষেত্ৰত হাতে-কামে ব্যৱস্থা গ্ৰহণৰ বাবে নিৰ্দেশনা দিছিল। তাৰ পাছত পৰিবহণ বিভাগৰ উদ্যোগত আৰু সহকাৰী পৰিবহণ আয়ুক্ত তথা অতিৰিক্ত দায়িত্ববাহী কামৰূপ মহানগৰ জিলাৰ জিলা পৰিবহণ বিষয়া গৌতম দাসৰ তত্বাবধানত পথ সুৰক্ষাৰ সজাগতাৰ বাবে চলোৱা বিভিন্ন অভিযানৰ অংশ হিচাপে মহানগৰীৰ চানমাৰিত অনুষ্ঠিত অসম গ্ৰন্থমেলাত এক সুৰক্ষা বিপনীযোগে বিভিন্ন ধৰণৰ কাৰ্যসূচী গ্ৰহণ কৰি মুখ্যমন্ত্ৰীৰ আহ্বান বাস্তৱায়িত কৰাৰ প্ৰচেষ্টা চলোৱা হৈছে৷ এই সন্দৰ্ভত গ্ৰন্থমেলাস্থলীত গ্ৰহণ কৰা ব্যতিক্ৰমী সজাগতা কাৰ্যসূচীৰ বিষয়ে উল্লেখ কৰি সহকাৰী পৰিবহণ আয়ুক্ত গৌতম দাসে কয় যে নিজতকৈও আগতেই একমাত্ৰ পুত্ৰৰ মৃত্যু কামনা কৰি ভগৱন্তৰ ওচৰত কৰা এগৰাকী দুৰ্ভগীয়া মাতৃৰ হৃদয়বিদাৰক প্ৰাৰ্থনাই সকলোৰে মন-মগজু চুই যায়। এইখন অসমৰে এটা সঁচা ঘটনাৰ আলমত এগৰাকী দুৰ্ভগীয়া মাতৃৰ কৰুণ প্ৰাৰ্থনাৰে পথ সুৰক্ষাৰ ক্ষেত্ৰত ব্যাপক জনসচেতনতাৰ বাবে চলোৱা প্ৰয়াস ৷
উল্লেখ্য যে, যোৱা ২৯ ডিচেম্বৰত অসম গ্ৰন্থমেলা উদ্বোধনৰ পিছতে ৰাজ্যৰ শিক্ষামন্ত্ৰী ডাঃ ৰনোজ পেগুৱে পৰিবহণ বিভাগৰ সুৰক্ষা বিপনীখন মুকলি কৰিছিল৷ প্ৰতিদিনে সুৰক্ষা বিপনীখনলৈ অহা যুৱপ্ৰজন্মৰ প্ৰতিনিধিকে ধৰি যানবাহন ব্যৱহাৰকাৰী সকলো লোকৰ হাতে হাতে তুলি দিয়া হৈছে পথ সুৰক্ষাৰ নীতি-নিয়ম সম্বলিত প্ৰচাৰ পুস্তিকা। ইফালে সুৰক্ষা বিপনীত বিনায়ক হোণ্ডাৰ ফালৰ পৰা যানবাহন ব্যৱহাৰকাৰীক ডিজিটেল মাধ্যমৰে প্ৰতিদিনে পথত মানি চলিবলগীয়া নীতি নিয়ম সন্দৰ্ভত অৱগত কৰা হৈছে।