পোষ্টেল বেলটৰ জৰিয়তে উগ্ৰপন্থীয়েও কৰিব ভোটদান!

সমাগত পাঁচ ৰাজ্যৰ বিধানসভা নিৰ্বাচন। নিৰ্বাচনৰ পূৰ্বেই নিৰ্বাচনী আয়োগে লৈছে এক গুৰুত্বপূৰ্ণ পদক্ষেপ। উগ্ৰপন্থীসকলৰ বাবে পোষ্টেল বেলট ব্যৱস্থাৰ অনুমোদন জনাইছে নিৰ্বাচনী আয়োগে। ইতিমধ্যে, মণিপুৰৰ ১৪ টা নিৰ্ধাৰিত শিবিৰত বাস কৰা উগ্ৰপন্থী গোটৰ সদস্যসকলক ৰাজ্যখনৰ বিভিন্ন বিধানসভা সমষ্টিৰ ভোটাৰ তালিকাত নামভৰ্তি কৰিছে। মণিপুৰৰ উগ্ৰপন্থী গোটসমূহৰ সদস্যসকলৰ যিসকলে চৰকাৰৰ সৈতে অভিযান স্থগিত আৰু বুজাবুজিৰ চুক্তিত স্বাক্ষৰ কৰিছে আৰু বৰ্তমান নিৰ্ধাৰিত শিবিৰত নিয়োজিত হৈ আছে তেওঁলোকে আগন্তুক বিধানসভা নিৰ্বাচনত পোষ্টেল বেলটৰ দ্বাৰা ভোটদান কৰিব পাৰিব বুলি ভাৰতীয় নিৰ্বাচন আয়োগৰ এক জাননীত প্ৰকাশ পাইছে ।
শুকুৰবাৰে নিশা মণিপুৰৰ মুখ্য নিৰ্বাচনী কাৰ্যালয়ে এক প্ৰেছ বিজ্ঞপ্তিত কয়, ‘জনপ্ৰতিনিধিত্ব আইন, ১৯৫১ৰ ধাৰা ৬০ ৰ ধাৰা (গ)ৰ দ্বাৰা প্ৰদান কৰা ক্ষমতা প্ৰয়োগ কৰি আৰু কেন্দ্ৰীয় চৰকাৰৰ সৈতে আলোচনা কৰি এই সিদ্ধান্ত লোৱা হৈছে। মণিপুৰৰ ১৪ টা নিৰ্ধাৰিত শিবিৰত বাস কৰা এছ.অ.অ.আৰু বুজাবুজি চুক্তি গোটৰ কেইবাজনো লোকক ৰাজ্যখনৰ বিভিন্ন বিধানসভা সমষ্টিৰ ভোটাৰ তালিকাত নামভৰ্তি কৰা হৈছে বুলি বিবেচনা কৰি এই সিদ্ধান্ত লোৱা হৈছে। ইচিআইয়ে নিৰ্দেশ দিছে যে এই নিৰ্বাচকসকলক তেওঁলোকৰ ভোটাধিকাৰৰ অধিকাৰ বিবেচনা কৰি পোষ্টেল বেলটৰ জৰিয়তে ভোটদানৰ অনুমতি দিয়া হ’ব কিয়নো তেওঁলোকে উক্ত নিৰ্ধাৰিত শিবিৰৰ পৰা বাহিৰলৈ যাব নোৱাৰে। উল্লেখ্য যে, মণিপুৰত মুঠ ৬০ টা বিধানসভা সমষ্টি আছে। প্ৰথম পৰ্যায়ত ২৭ ফেব্ৰুৱাৰীত ৩৮ টা সমষ্টিৰ বাবে নিৰ্বাচন অনুষ্ঠিত হ’ব আৰু ৩ মাৰ্চত বাকী ২২টা সমষ্টিত দ্বিতীয় পৰ্যায়ত ভোটদান প্ৰক্ৰিয়া অনুষ্ঠিত হ’ব।