আৰক্ষীয়ে এজাহাৰ পঞ্জীয়ন কৰিবলৈ বাধ্য, অন্যথা হ’ব লাগিব আদালতৰ সন্মুখীন

আইনৰ ৰক্ষক হৈয়ো বহু সময়ত অসম আৰক্ষীয়ে নিজেই আইন ভংগ কৰা দেখা যায়। সেয়েহে আইনৰ অপব্যৱহাৰ কৰা আৰক্ষীক দায়বদ্ধ কৰিবলৈ অসম চৰকাৰৰ গৃহ বিভাগে ব্যাপক সংশোধনেৰে আৰক্ষী দায়বদ্ধতা আয়োগ নতুনকৈ সংগঠনৰ দিশে আগবাঢ়িছে। ইয়াৰ বাবে কালি বিধানসভাত দ্য আছাম পুলিচ (এমেণ্ডমেণ্ট) বিল উত্থাপন কৰি গৃহ বিভাগৰ দায়িত্বত থকা মুখ্যমন্ত্ৰী হিমন্ত বিশ্ব শৰ্মাই কয় যে ৰাজ্যত দায়বদ্ধতা আয়োগ আছে যদিও বৰ্তমান আয়োগখন সক্ৰিয় হৈ থকা পৰিলক্ষিত হোৱা নাই। সেয়েহে আৰক্ষীক দায়বদ্ধ কৰিবলৈ জিলা আৰু ৰাজ্যিক পৰ্যায়ৰ আয়োগক নতুন কৰ্তৃত্ব প্ৰদানৰ সিদ্ধান্ত লোৱা হৈছে।
আয়োগ গঠনৰ সন্দৰ্ভত উচ্চতম ন্যায়ালয়ৰ নিৰ্দেশনা আছে যদিও ৰাজ্য চৰকাৰে মূল বিষয়ত হস্তক্ষেপ নকৰাকৈ ৰাইজৰ হকে কিছুমান নতুন বিষয়ৰ অৱতাৰণা কৰিবলৈ আগবাঢ়িছে বুলিও মুখ্যমন্ত্ৰীয়ে সদৰী কৰে। তেওঁ কয় যে জিলা পৰ্যায়ৰ আয়োগখনে তলৰ পৰা উপ-আৰক্ষী অধীক্ষকলৈ সামৰি লয়। ৰাজ্যিক পৰ্যায়ৰ আয়োগখনে আৰক্ষী অধীক্ষকৰ পৰা ওপৰৰ বিষয়াসকলক সামৰি লয় ।
অসমৰ ক্ষেত্ৰত প্ৰয়োজন সাপেক্ষে ভাৰপ্ৰাপ্ত বিষয়াকো ৰাজ্যিক পৰ্যায়ৰ আয়োগে সামৰি ল’ব বুলি উল্লেখ কৰি মুখ্যমন্ত্ৰীয়ে কয়, ‘দেশত প্ৰচলিত দায়বদ্ধ আয়োগত আৰক্ষীয়ে ধৰ্ষণৰ অভিযোগতহে আয়োগৰ ওচৰত দায়বদ্ধ হ’ব লাগে যদিও অসমত ধৰ্ষণৰ চেষ্টা আৰু যৌন নিৰ্যাতন দুটাকো বিষয়কে ইয়াৰ লগত সংযোগ কৰিছো। বহু সময়ত আৰক্ষীয়ে অভিযোগকাৰীৰ এজাহাৰ পঞ্জীয়ন নকৰাৰ অভিযোগ উঠে, নতুন নিয়ম মতে কোনো আৰক্ষী বিষয়াই এজাহাৰ পঞ্জীয়ন নকৰিলে আবেদনকাৰীয়ে স্থানীয় আদালতত বিষয়টো জনাব পাৰিব। আনহাতে ভুল তথ্য আৰু ভুৱা গোচৰৰ দিশটোৰ ক্ষেত্ৰতো সতৰ্কতা অৱলম্বন কৰা হৈছে। আয়োগৰ কৰ্মচাৰীসকলক আয়োগে বাছনি কৰিব পৰা সংশোধনীও নতুন বিধেয়কত অনা হৈছে বুলি মুখ্যমন্ত্ৰীয়ে উল্লেখ কৰে। উল্লেখ্য যে সংশোধিত দায়বদ্ধতা আয়োগৰ দ্বাৰা আৰক্ষীক বৰ্তমানতকৈ অধিক ক্ষমতা দি অৰাজকতা সৃষ্টি কৰিব বিচৰা হৈছে বুলি এআইইউডিএফৰ আমিনুল ইছলাম, কংগ্ৰেছৰ ৰকিবুল হুছেইন, ৰাইজৰ দলৰ অখিল গগৈ আদিয়ে আশংকা ব্যক্ত কৰে ।