উচ্চতম ন্যায়ালয়ত আজি মহাৰাষ্ট্ৰৰ ৰাজনীতি আৰু একনাথ সিন্দেৰ চৰকাৰ গঠনৰ শুনানি হ’ব। প্ৰকৃততে, ন্যায়ালয়ে একনাথ সিন্দে চৰকাৰৰ সাংবিধানিকতাৰ ওপৰত ৰায় দিব।
উল্লেখ্য যে, উদ্ধৱ ঠাকৰে আৰু একনাথ সিন্দেৰ হৈ উচ্চতম ন্যায়ালয়ত ইতিমধ্যে কেইবাখনো আবেদন বা গোচৰ দাখিল কৰা হৈছে। এই সকলোবোৰ গোচৰৰ আজি শুনানি হ’ব। অধিবক্তা অনিশ শ্বাহে দাখিল কৰা তেওঁৰ আবেদনত শিৱসেনাৰ নেতা সুভাষ দেশাই কয়, “আবেদনকাৰীয়ে ৩০ জুন, ২০২২ ৰ ৰাজ্যপালৰ অসাংবিধানিক আৰু অবৈধ কাৰ্যক প্ৰত্যাহ্বান জনাইছে, য’ত একনাথ সিন্দেক মহাৰাষ্ট্ৰৰ মুখ্যমন্ত্ৰী হ’বলৈ আমন্ত্ৰণ জনোৱা হৈছিল…”
আবেদনখনত কোৱা হৈছে, “শিৱসেনা হৈছে নিৰ্বাচন আয়োগে স্বীকৃতি দিয়া এটা আঞ্চলিক ৰাজনৈতিক দল। নিৰ্বাচন আয়োগেও ইয়াৰ কাৰ্য্যালয়ৰ বিষয়াসকলক স্বীকৃতি দিছে। উদ্ধৱ ঠাকৰে শিৱসেনাৰ সভাপতি। অন্তিম সাংগঠনিক নিৰ্বাচন ২০১৮ চনত অনুষ্ঠিত হৈছিল আৰু ভাৰতৰ নিৰ্বাচন আয়োগক জনোৱা হৈছিল। শিৱসেনাৰ সাংগঠনিক গাঁথনিত কোনো পৰিৱৰ্তন হোৱা নাই আৰু উদ্ধৱ ঠাকৰেৰ নেতৃত্বৰ প্ৰতি কোনো বিতৰ্ক আৰু প্ৰত্যাহ্বান নাই।”
আবেদনখনে সিন্দেক মহাৰাষ্ট্ৰৰ মুখ্যমন্ত্ৰী হিচাপে শপত ল’বলৈ আৰু চৰকাৰ গঠন কৰিবলৈ আমন্ত্ৰণ জনোৱা ৰাজ্যপালৰ সিদ্ধান্তক বাতিল কৰিবলৈ নিৰ্দেশনা বিচাৰিছে। ইয়াৰ পূৰ্বে, উদ্ধৱ ঠাকৰে গোটৰ বিধায়কসকলক সকাহ দি উচ্চতম ন্যায়ালয়ে কৈছিল যে নতুন অধ্যক্ষই বৰ্তমানৰ বাবে কোনো বিধায়কৰ বিৰুদ্ধে কোনো ব্যৱস্থা গ্ৰহণ কৰিব নোৱাৰিব
