ৰাজ্য চৰকাৰৰ অসমমালা আঁচনিৰ অধীনত নিৰ্মাণ সম্পূৰ্ণ হোৱা প্ৰথমটো বৃহৎ দৈৰ্ঘ্যৰ পথ হিচাপে পৰিগণিত হোৱাৰ দিশে আগবাঢ়িছে গুৱাহাটীৰ পশ্চিম প্ৰান্তৰ পলাশবাৰী – চানডুবি সংযোগী দুইলেনযুক্ত নব নিৰ্মিত পথ ছোৱাই। উল্লেখযোগ্য যে, অসম চৰকাৰৰ লোকনির্মাণ পথ বিভাগৰ মিৰ্জাস্থিত দক্ষিণ কামৰূপ ক্ষেত্ৰীয় পথ সংমণ্ডলৰ অন্তৰ্গত পলাশবাৰী উপ সংমণ্ডলৰ তদাৰকতাত অসমমালা আঁচনিৰ অধীনত বিগত ২০২১ বৰ্ষৰ ২৪ ফেব্ৰুৱাৰীত আধাৰশিলা স্থাপনৰে পলাশবাৰীত ব্ৰহ্মপুত্ৰৰ পুৰণি ঘাটৰ পৰা পলাশবাৰী, মিৰ্জা, বৰিহাট, লোহাৰঘাট, বৰদুৱাৰ বাগানহৈ মুদকীলৈ নিৰ্মাণৰ শুভাৰম্ভ কৰা হৈছিল প্ৰায় ২৯ কিঃমিঃ দৈৰ্ঘ্যৰ এটা দুই লেনযুক্ত এটা পথ। ১৬৪.৫৫ কৌটি টকা ব্যয়ৰে নিৰ্মাণ কৰা পথটোৰ নিৰ্মাণকাৰ্য সম্পূৰ্ণ কৰাৰ বাবে ২৪ মাহ বা দুই বছৰ লক্ষ্য নিৰ্ধাৰণ কৰা হৈছিল। এই সন্দৰ্ভত দক্ষিণ কামৰূপ ক্ষেত্ৰীয় পথ সংমণ্ডলৰ কাৰ্যবাহী অভিযন্তা কাৰ্তিক বিশ্বাসে জানিবলৈ দিয়া মতে ৰাষ্ট্ৰীয় ঘাইপথৰ দৰে একে মানদণ্ডৰে নিৰ্মাণ কৰি থকা পথছোৱা নিৰ্ধাৰিত লক্ষ্যৰ ছয়মাহ পূৰ্বে প্ৰায় ৯৮ শতাংশৰো অধিক নিৰ্মাণ কাৰ্য সম্পূৰ্ণ হৈ উঠিছে। বিভাগৰ ফালৰ পৰা ২০২৩ বৰ্ষৰ ফেব্ৰুৱাৰী মাহত নিৰ্মাণ সম্পূৰ্ণ কৰাৰ লক্ষ্য নিৰ্ধাৰণ কৰা হৈছিল। বাকী অৱশিষ্ট কামখিনী বতৰ ঠিকে থাকে থাকিলে দুৰ্গা পূজাৰ আগে – পাছে সম্পূৰ্ণ কৰাৰ লক্ষ্যৰে দায়িত্ববাহী ঠিকাদাৰে দিনে নিশাই কাম কৰি থকা পৰিলক্ষিত হৈছে।
দিছপুৰৰ এক উচ্চস্তৰীয় সূত্ৰই সদৰি কৰা অনুসৰি ৰাজ্য চৰকাৰৰ লোকনির্মাণ বিভাগৰ দায়িত্বত থকা মুখ্যমন্ত্ৰী ডঃ হিমন্ত বিশ্ব শৰ্মাই সেউজ সংকেত দিলেই আগন্তুক শাৰদীয় শ্ৰী শ্ৰী দূৰ্গা পূজাৰ পাছতে পথছোৱা আনুষ্ঠানিক ভাৱে মুকলি কৰাৰ সম্ভাৱনা আছে। উল্লেখযোগ্য যে পলাশবাৰী – চানডুবি পথছোৱা নিৰ্মাণৰ দায়িত্ব লাভ কৰিছে দিছপুৰ চুপাৰ মাৰ্কেটৰ উৰণীয়া সেঁতুখন নিৰ্ধাৰিত সময়ৰ ১৪ মাহ পূৰ্বে নিৰ্মাণ সম্পূৰ্ণ কৰি লোকনির্মাণ বিভাগত এক বিৰল ইতিহাসৰ সৃষ্টি কৰা ঠিকাদাৰ তথা দক্ষিণ কামৰূপৰ মিৰ্জাৰ উদ্যমী ব্যক্তি অনিল দাসে। উল্লেখযোগ্য যে পলাশবাৰীৰ পৰা মিৰ্জা হৈ চানডুবি সংযোগী পথৰ মুদকীলৈ নিৰ্মাণ কৰি থকা পথছোৱাৰ যিবিলাক স্থানত পদপথ সহিতে পানী পৰিবাহী নলা থাকিব তাত বহল হৈছে ১৫ মিটাৰ। তেনেদৰে নলা – পদপথ নথকা স্থানত বহল হব ১৪ মিটাৰ। পূৰ্বতে মাত্ৰ ৩.৭৫ মিটাৰ বহলৰ একক লেনৰ পকীঅংশ সহ মুঠ বহল আছিল মাত্ৰ ৭.৫০ মিটাৰ। পথটোত বৰদুৱাৰ চাহ বাগিচাৰ কলঘৰৰ সন্মুখত ৭৫ মিটাৰ দৈৰ্ঘ্যৰ এখন দলং নিৰ্মাণ কৰা হৈছে। যত তলেৰেও পূৰ্বৰ পথৰেও বাহন চলাচল কৰাৰ ব্যৱস্থা ৰখা হৈছে। পথছোৱাৰ মিৰ্জা ৰেল ষ্টেচনৰ সমীপত থকা ৰেলৱে ক্ৰছিংটোত অনাগত দিনত এখন উৰণীয়া সেঁতুৰ নিৰ্মাণৰ বাবেও ব্যৱস্থা ৰখা হৈছে। যত উৰণীয়া সেঁতুসহ পথৰ দৈৰ্ঘ্য হব প্ৰায় ১,৩০০ মিটাৰ বা ১.৩ কিঃমিঃ।
আনহাতে কাৰ্যবাহী অভিযন্তা কাৰ্তিক বিশ্বাসে জানিবলৈ দিয়া মতে পলাশবাৰী উপ সংমণ্ডলৰ সহকাৰী কাৰ্যবাহী অভিযন্তা বিশ্বদেৱ গোস্বামীকে ধৰি কেবাজনো সহকাৰী অভিযন্তা, কনিষ্ঠ অভিযন্তা , শাখা সহায়ক আদিয়ে নিৰ্মাণ কার্যৰ সময়ত নিৰন্তৰ পৰ্যবেক্ষণ কৰি আহিছে। পথচোৱা আনুষ্ঠানিক ভাৱে মুকলি হোৱাৰ পাছত দক্ষিণ কামৰূপৰ লগতে পশ্চিম গুৱাহাটীৰ অসম – মেঘালয় সীমান্তবৰ্তী অঞ্চল সমূহত পথ যাতায়তৰ ক্ষেত্ৰখনত এক নতুন যুগৰ সংযোজন হোৱাটো নিশ্চিত। ইফালে প্ৰকৃতিৰ ৰম্যভূমি হিচাপে পৰিচিত চানডুবিৰ পৰা মাত্ৰ ছয় কিঃমিঃ নিলগৰ মুদকীলৈ পথচোৱা নিৰ্মাণ হৈ উঠিলে চানডুবিকে ধৰি বৃহত্তৰ অঞ্চলটোৰ পৰ্যটনৰ ক্ষেত্ৰখনেও নতুন ৰূপ পোৱাটো নিশ্চিত। ইফালে মুদকীৰ পৰা চানডুবিৰ পৰ্যটন ক্ষেত্ৰলৈ প্ৰায় ৬ কিঃমিঃ দৈৰ্ঘ্যৰ পথছোৱাৰ দুয়োফালে শাল, চেগুনকে ধৰি বহু মূল্যবান গছ গছনি থকা বাবে মুখ্যমন্ত্ৰী ডঃ হিমন্ত বিশ্ব শৰ্মাই ৰাইজৰ আহ্বানৰ প্ৰতি সঁহাৰি জনায় সেই অংশত পাৰিপাৰ্শ্বিক ভাৰসাম্য ৰক্ষাৰ স্বাৰ্থত গছ কাটি, অৰণ্য ধ্বংস কৰি পথ নিৰ্মাণ কৰা নহয় বুলি ইতিমধ্যে ঘোষণা কৰিছে। পৰিবেশ সংৰক্ষণৰ দিশটোৰ প্ৰতি লক্ষ্য ৰাখি বিগত সময়ছোৱাত পথৰ দুয়োদাঁতিত কৃষ্ণচুড়া, ৰাধাচুড়া, সোণাৰু, এজাৰ, মহানিমকে ধৰি বিভিন্ন থলুৱা প্ৰজাতিৰ আৰু অঞ্চলটোৰ পাৰিপাৰ্শ্বিক জলবায়ুৰ লগত খাপখোৱা কেবা হাজাৰ গছপুলি বিভাগৰ সকলো পৰ্যায়ৰ অভিযন্তা, কৰ্মচাৰী আৰু ঠিকাদাৰ অনিল দাসসহ তেওঁৰ শ্ৰমিক – কৰ্মচাৰীয়ে ৰোপণ কৰিছে।
