অৰ্থনীতিৰ বিধ্বস্ত ৰূপঃ মানুহৰ জীৱনতকৈও যেন বেছি গুৰুত্বপূৰ্ণ নিৰ্বাচন!

কভিডে বিধ্বস্ত কৰিছে দেশৰ অৰ্থনীতি। কভিডৰ নতুন নতুন ভেৰিয়েন্টৰ সংক্ৰমণ ঘটিছে সমগ্ৰ দেশত। বহুজনে ইয়াক ক’ৰোণাৰ তৃতীয় ঢৌ বুলিও কব বিচাৰিছে। এদিনতে বাঢ়িছে প্ৰায় ২১ শতাংশ ক’ৰোণাৰ সংক্ৰমন। বহুকেইখন ৰাজ্যত কভিড সংক্ৰান্তীয় নতুন SOPজাৰি কৰা হৈছে। কোঙা কৰা অৰ্থনীতি, ক’ভিড পৰিস্থিতিৰ অৱনতি তথা তৃতীয় ঢৌৰ আশংকাৰ মাজতেই আজি পাঁচ ৰাজ্যৰ বহু চৰ্চিত বিধানসভা নিৰ্বাচন সন্দৰ্ভত আনুষ্ঠানিক ঘোষণা কৰিলে নিৰ্বাচন আয়োগে। নিৰ্বাচন আয়োগৰ বাবে মানুহৰ জীৱনতকৈও যেন বেছি গুৰুত্বপূৰ্ণ নিৰ্বাচন! মুখ্য নিৰ্বাচন আয়ুক্ত সুশীল চন্দ্ৰাই আজি সংবাদ মেলযোগে কঠোৰ ক’ভিড প্ৰতিৰোধী নীতি-নিৰ্দেশনাৰ মাজেৰে এই নিৰ্বাচন অনুষ্ঠিত কৰা হ’ব বুলি প্ৰকাশ কৰিছে যদিও ভাৰতবৰ্ষৰ দৰে দেশত এইয়া কিমানদূৰ সম্ভৱ, সেয়া সময়েহে কব।
আয়োগে কৰা ঘোষণা অনুসৰি ১০ ফেব্ৰুৱাৰীত প্ৰথম পৰ্যায়ৰ নিৰ্বাচন, ১৪ ফেব্ৰুৱাৰীত দ্বিতীয় পৰ্যায়ৰ, ২০ ফেব্ৰুৱাৰীত তৃতীয় পৰ্যায়ৰ, ২৩ ফেব্ৰুৱাৰীত চতুৰ্থ পৰ্যায়ৰ. ২৭ ফেব্ৰুৱাৰীত পঞ্চম পৰ্যায়ৰ, ৩ মাৰ্চত ৬ষ্ঠ পৰ্যায়ৰ আৰু ৭ মাৰ্চত সপ্তম তথা অন্তিম পৰ্যায়ৰ নিৰ্বাচন অনুষ্ঠিত হ’ব। উত্তৰ প্ৰদেশত সাতটা পৰ্যায়ত ১০ ফেব্ৰুৱাৰীৰ পৰা ৭ মাৰ্চলৈ বিধানসভা নিৰ্বাচন অনুষ্ঠিত হ’ব। পঞ্জাব, উত্তৰাখণ্ড আৰু গোৱাত ১৪ ফেব্ৰুৱাৰীত নিৰ্বাচন অনুষ্ঠিত হ’ব। মণিপুৰত ২৭ ফেব্ৰুৱাৰী, ৩ মাৰ্চত অনুষ্ঠিত হ’ব নিৰ্বাচন। আনহাতে ভোটগণনা কৰা হ’ব ১০ মাৰ্চত। দেশৰ ক’ভিড পৰিস্থিতিৰ প্ৰতি লক্ষ্য ৰাখি অহা ১৫ জানুৱাৰীলৈ সকলো ধৰণৰ ৰাজনৈতিক সভা, পদযাত্ৰা, ৰেলী আদি অনুষ্ঠিত কৰাটো নিষিদ্ধ কৰা হৈছে। চন্দ্ৰাই ঘোষণা কৰে যে, কোনো ধৰণৰ নিৰ্বাচনী ৰেলী অনুষ্ঠিত কৰাৰ অনুমতি দিলেও সেয়া জিলা দুৰ্যোগ ব্যৱস্থাপনা প্ৰাধিকৰণৰ নিৰ্দেশনা মানি অনুষ্ঠিত কৰিব লাগিব। আনহাতে ঘৰে ঘৰে নিৰ্বাচনী প্ৰচাৰ চলাবৰ বাবে সৰ্বাধিক ছজন লোককহে অনুমতি দিয়া হৈছে। আজিৰ পৰাই এই ৰাজ্যসমূহত আদৰ্শ নিৰ্বচনী বিধি বলৱৎ হোৱাৰ কথাও ঘোষণা কৰে।
নিৰ্বাচন আয়োগে প্ৰকাশ কৰা অনুসৰি এই ৰাজ্যসমূহত প্ৰথমবাৰৰ বাবে ভোটদান কৰিব ২৪.৯ লাখ ভোটাৰে। পাঁচ ৰাজ্যত মুঠ ভোটাৰৰ সংখ্যা হৈছে ১৮.৩৪ কোটি। পঞ্জাব, উত্তৰ প্ৰদেশৰ দৰে গুৰুত্বপূৰ্ণ ৰাজ্যৰ নিৰ্বাচনৰ দিন ঘোষণাই এতিয়া দেশত ৰাজনৈতিক আৱহাৱা উত্তাল কৰি তুলিছে। মন কৰিবলগীয়া যে, নিৰ্বাচন আয়োগে ৰাজহুৱা সভা তথা বৃহৎ ৰাজনৈতিক সমাৱেশ বন্ধ কৰিবলৈ নিৰ্দেশ দিছে। দেশৰ নিৰ্বাচনী ইতিহাসত ই ডিজিটেল যুগৰ আৰম্ভণি ঘটোৱা বুলিও চৰ্চা চলিছে। বৃহৎ সমাৱেশ নোহোৱাকৈ, ৰেলী বা পদযাত্ৰা অনুষ্ঠিত নকৰাকৈ যদিহে এই নিৰ্বাচন অনুষ্ঠিত হয় তেন্তে ই দেশৰ ৰাজনৈতিক ইতিহাসৰ এক উল্লেখনীয় ঘটনা বিবেচিত হ’ব।