দলৰ ভিতৰুৱা অন্তঃকন্দলত পৰি মহাৰাষ্ট্ৰৰ উদ্ধৱ ঠাকুৰৰ চৰকাৰখনৰ বৰ্তমান স্থিতি খুবেই সংকটজনক। শিৱসেনাৰ মুখ্যমন্ত্ৰী উদ্ধৱ ঠাকৰেয়ে এই পৰ্যন্ত চৰকাৰখন বচাবলৈ যৎপৰোনাস্তি কৰি আছে। তেওঁ দলৰ কৰ্মীসকলৰ সমৰ্থকসকললৈ এটা বাৰ্তাও প্ৰেৰণ কৰিছিল। মহাৰাষ্ট্ৰৰ মুখ্যমন্ত্ৰীয়ে কৈছিল যে যদি শিৱ সৈনিকসকলে তেওঁক অযোগ্য বুলি ভাবে আৰু দলটো চলাবলৈ বিফল হোৱা বুলি ভাৱে তেন্তে তেওঁ দল আৰু মুখ্যমন্ত্ৰীৰ পদৰ পৰা পদত্যাগ কৰিবলৈ সাজু। অৱশ্যে, শিৱসেনাৰ সাংসদ সঞ্জয় ৰাউতে কয়, “উদ্ধৱ ঠাকৰেয়ে পদত্যাগ নকৰে। প্ৰয়োজন হ’লে সকলো শিৱ সৈনিক ৰাজপথলৈ ওলাই আহিব। ”
উদ্ধৱ ঠাকৰেয়ে শুকুৰবাৰে এনচিপিৰ মুৰব্বী শৰদ পাৱাৰৰ সৈতে চৰকাৰ ৰক্ষাৰ্থে এখন বৈঠকো কৰিছে। ইয়াৰ পিছতে মহাৰাষ্ট্ৰৰ মুখ্যমন্ত্ৰীয়ে বিদ্ৰোহী নেতা একনাথ সিন্দেৰ বিৰুদ্ধে মুখ খুলি দলৰ কৰ্মী আৰু সমৰ্থকসকললৈ এক আৱেগিক বাৰ্তা প্ৰেৰণ কৰে।
উদ্ধৱ ঠাকৰেয়ে কয় যে, যদি আপোনালোকে ভাবে যে মই অক্ষম, তেন্তে মই এই মুহূৰ্তত দলৰ পৰা পদত্যাগ কৰিম। যদি আপুনালোকে ভাবে যে মই দলটো চলাবলৈ বিফল হৈছো, তেন্তে মই নিজকে দলৰ পৰা পৃথক কৰিম। ভিডিঅ’ বাৰ্তাটোত তেওঁ বিদ্ৰোহী নেতা একনাথ সিন্দেকো লক্ষ্য কৰি কয় যে, শিৱসেনা এতিয়াও শেষ হোৱা নাই। যি সকলে বিজেপিৰ পক্ষ লৈছে তেওঁলোকে দলটোৰ ক্ষতি কৰিছে।
