১৮ অক্টোবৰত অনুষ্ঠিত হ’বলগীয়া ভাৰতীয় ক্ৰিকেট নিয়ন্ত্ৰণ পৰিষদৰ সভাপতি পদৰ নিৰ্বাচনৰ সমান্তৰালকৈ অন্ত পৰিব ভাৰতীয় ক্ৰিকেট দলৰ প্ৰাক্তন অধিনায়ক সৌৰভ গাংগুলীৰ সভাপতিত্ব। সৌৰভ গাংগুলীৰ আসনত উপৱিষ্ট হোৱাৰ সম্ভাৱনা প্ৰৱল হৈ আছে প্ৰাক্তন ক্ৰিকেটাৰ ৰজাৰ বিন্নীৰ। ৰজাৰ বিন্নী আছিল ১৯৮৩ চনৰ ঐতিহাসিক বিশ্বকাপ বিজয়ী দলৰ সদস্য ।
উল্লেখ্য যে, সভাপতি পদৰ বাবেই নহয় বৰং আন বহু কেইটা পদৰ বাবে অনুষ্ঠিত হ’বলগীয়া এই নিৰ্বাচনত, যুটীয়া সম্পাদক পদৰ বাবে মনোনয়ন দাখিল কৰিলে অসম ক্ৰিকেট সন্থাৰ সম্পাদক দেৱজিৎ শইকীয়াই ।
দেৱজিৎ শইকীয়াই অসম ক্ৰিকেট সন্থাৰ সম্পাদক ৰূপে কাৰ্যনিৰ্বাহ কৰি থকাৰ ওপৰিও প্ৰাক্তন প্ৰথম শ্ৰেণীৰ ক্ৰিকেটাৰ আছিল। ১২ অক্টোবৰত অন্ত পৰিব মনোনয়ন দাখিলৰ অন্তিম সময় । এতিয়ালৈ মনোনয়ন দাখিল কৰা প্ৰাৰ্থীসকলৰ প্ৰকাশ পোৱা অনানুষ্ঠানিক তালিকা অনুসৰি, বি চি চি আইৰ সভাপতি পদৰ বাবে ৰ’জাৰ বিন্নী, উপ সভাপতি পদৰ বাবে ৰাজীৱ শুক্লা, যুটীয়া সম্পাদক পদৰ বাবে দেৱজিৎ শইকীয়া আৰু ৰোহন জেটলী, কোষাধক্ষ্য পদৰ বাবে আশ্বিষ শ্বেলাৰ আৰু আই পি এলৰ অধ্যক্ষ পদৰ বাবে অৰুণ ধুমালে আগবঢ়াইছে মনোনয়ন।
