প্ৰায় ১৫.৭৬ লাখ মাটিৰ বন্তিৰে জিলিকি উঠিল ৰামৰ জন্মভূমি অযোধ্যা । উত্তৰ প্ৰদেশৰ মুখ্যমন্ত্ৰী যোগী আদিত্যনাথ চৰকাৰৰ ‘দীপোৎসৱ’ উপলক্ষ্যে সজাই পৰাই তোলা হ’ল সমগ্ৰ চহৰ খনক । ইয়াৰ সৈতেই গীনিজ বুক অৱ ৱৰ্ল্ড ৰেকৰ্ডছত মাটিৰ বন্তি প্ৰজ্বলনৰ সৰ্ববৃহৎ প্ৰদৰ্শনী হিচাপে স্থান লাভ কৰিলে দীপোৎসৱে ।
তদুপৰি অযোধ্যা বিশ্ববিদ্যালয়ৰ শিক্ষাৰ্থী আৰু অধ্যাপক সকলেও যোগদান কৰে এই কাৰ্যসূচীত । এটিৰ পাছত আন এটিকৈ ১৫ লাখতকৈও অধিক বন্তি প্ৰজ্বলন কৰা হয় ।
তাৰ পাছতেই উত্তৰ প্ৰদেশৰ মুখ্যমন্ত্ৰী যোগী আদিত্যনাথক গীনিজ বুক অৱ ৱৰ্ল্ড ৰেকৰ্ডছৰ প্ৰমাণপত্ৰ প্ৰদান কৰা হয় নৰেন্দ্ৰ মোডীৰ উপস্থিতিত ।
উল্লেখ্য যে, ২০১৭ চনত প্ৰথমবাৰৰ বাবে ১.৭৬ লাখ বন্তি প্ৰজ্বলনেৰে উত্তৰ প্ৰদেশত দীপোৎসৱৰ আৰম্ভণি কৰা হৈছিল আৰু তাৰ পাছৰে পৰাই প্ৰত্যেক বছৰেই বৃদ্ধি হৈ গৈছিল মাটিৰ বন্তিৰ সংখ্যা । ২০১৮ বৰ্ষত ৩.০১ লাখ, ২০১৯ বৰ্ষত ৪.০৪ লাখ, ২০২০ বৰ্ষত ৬.০৬ লাখ আৰু ২০২১ বৰ্ষত ৯.৪১ লাখ মাটিৰ বন্তিৰে পোহৰাই তোলা হৈছিল চহৰ খনক ।
