হলীউডলৈ যাত্ৰা কৰিলে আলিয়া ভাটে

আলিয়া ভাটৰ অনুৰাগীলৈ সুখবৰ ৷ শেহতীয়াকৈ বলীউডত খলকনি তোলা গংগুবাই কাথিয়াবাড়ীৰৰ পিছতেই এই পবিত্ৰ নাৰী দিৱসৰ সন্ধিক্ষণত আলিয়াই প্ৰকাশ কৰিলে এই সুখবৰটি ৷ ব্ৰিটিছ চলচ্চিত্ৰ নিৰ্মাতা টম হাৰ্পাৰে নিৰ্মাণ কৰিবলগীয়া ছবি হাৰ্ট অব্ ষ্ট’নত অভিনয় কৰিব আলিয়াই ৷ এইবাৰ হলীউড চুপাৰষ্টাৰ গাল গাডট আৰু জেমী ডৰনানৰ সৈতে অভিনয় কৰিব আলিয়া ভাটে ৷

টম হাৰ্পাৰে নিৰ্মাণ কৰিবলগীয়া ছবিখনৰ চিত্ৰনাট্য Greg Rucka আৰু Allison Schroeder ৰ ৷ কাহিনীৰ মূল বিষয় সম্পৰ্কে বৰ্তমানলৈকে জানিব পৰা হোৱা নাই ৷ ছবিখনৰ প্ৰযোজনাত আছে Skydance’s David Ellison, Dana Goldberg আৰু Don Granger ৷ তেওঁলোকৰ লগতে Mockingbird’s Bonnie Curtis, Julie Lynn, Pilot Wave’s Gadot আৰু Jaron Varsano এ যুটীয়াভাৱে ছবিখন প্ৰযোজনা কৰিব ৷ ক’ৰণা মহামাৰীৰ পৰিপ্ৰেক্ষিতত একপ্ৰকাৰ বিধ্বস্ত হৈ পৰা ছবিগৃহসমূহ পুনৰ সজীৱ কৰি তুলিলে আলিয়াৰ শেহতীয়া ছবি গংগুবাই কাথিয়াবাড়ীয়ে ৷

বহুসময়ৰ বিৰতিৰ মূৰত দৰ্শকে ছবিগৃহত এখন সুন্দৰ চিনেমা উপভোগ কৰিলে ৷ ইপিনে ৰণবীৰ কাপুৰ আৰু বিগ বি অমিতাভ বচ্চনৰ সৈতে পৰৱৰ্তী ছবি ব্ৰহ্মাস্ত্ৰত দেখিবলৈ পোৱা যাব আলিয়া ভাটক ৷ আয়ান মুখাৰ্জীৰ নিৰ্দেশনাত মুক্তি পাব ব্ৰহ্মাস্ত্ৰ ছবিখন ৷ বৰ্তমান এছ এছ ৰাজামৌলীৰ RRR ৰ মুক্তিৰ অপেক্ষাত আছে অভিনেত্ৰীগৰাকী ৷