নগাঁৱৰ পৰা সদ্য বদলি কৰা আৰক্ষী অধীক্ষক আনন্দ মিশ্ৰ সন্দৰ্ভত এইদৰে প্ৰতিক্ৰিয়া প্ৰকাশ কৰে মুখ্যমন্ত্রী হিমন্ত বিশ্ব শৰ্মাই । নগাঁও এনকাউণ্টাৰৰ ঘটনাৰ পিছৰে পৰা চৰ্চাত থকা আৰক্ষী অধীক্ষক আনন্দ মিশ্ৰক বুধবাৰে নিশা তাৎক্ষণিকভাৱে বদলিৰ নিৰ্দেশ দিয়াৰ পিছতে তীব্ৰ প্ৰতিক্ৰিয়াৰ সৃষ্টি হোৱা বিষয়টো সন্দৰ্ভত মন্তব্য আগবঢ়াইছে মুখ্যমন্ত্ৰী ড০ হিমন্ত বিশ্ব শৰ্মাই ।
এই সন্দৰ্ভত বৃহস্পতিবাৰে মুখ্যমন্ত্রীগৰাকীয়ে সংবাদ মাধ্যমৰ আগত কয় যে কীৰ্তি কমল বৰাৰ ঘটনাৰ সৈতে তেওঁৰ কোনো সম্পৰ্ক নাই, সেই ফালৰ পৰা তেওঁৰ বিপক্ষে তদন্ত সমিতিয়ে কোনো তথ্য প্ৰদান কৰা নাই । মুখ্যমন্ত্রীয়ে কয় যে আৰক্ষী নিৰীহ লোকৰ লগত থাকিব লাগে, অপৰাধীৰ বিৰুদ্ধে কঠোৰ হ’ব লাগে ।
অপৰাধীৰ বিৰুদ্ধে কঠোৰ হ’বলৈ যদি আমি সাধাৰণ নাগৰিকৰ বিৰুদ্ধেও কঠোৰ হঁও তেন্তে আমাৰ গোটেই উদ্দেশ্যটোৱে বিফল হ’ব বুলি মুখ্যমন্ত্ৰীয়ে কয় ।
প্ৰতিবেদনত এনকাউণ্টাৰটোক ভুৱা আখ্যা দিয়াৰ লগতে আনন্দ মিশ্ৰৰ এণ্টি নাৰ্কটিক্স স্কোৱাড ভংগ কৰি স্কোৱাডৰ সকলো সদস্যকে আন জিলালৈ বদলিৰ নিৰ্দেশ দিছিল । আনহাতে ঘটনা সন্দৰ্ভত উপ-পৰিদৰ্শক প্ৰদীপ বনিয়াক নিলম্বন কৰা হৈছিল ।অৱশ্যে প্ৰতিবেদনত আনন্দ মিশ্ৰৰ কোনো কথা উল্লেখ নথকাৰ পাছতো বুধবাৰে জিলাখনৰ আৰক্ষী অধীক্ষক গৰাকীয়ে সংবাদ মেল পাতি অতিৰিক্ত মুখ্য সচিবৰ প্ৰতিবেদনৰ বিপৰীত স্থিতি গ্ৰহণ কৰি কীৰ্তি কমল বৰাৰ বিৰুদ্ধে কেইবাটাও বিস্ফোৰক মন্তব্য কৰিছিল । তাৰ পাছতেই তেওঁক নগাঁৱৰ পৰা অসম আৰক্ষীৰ মুখ্য কাৰ্যালয়লৈ বদলি কৰা হৈছিল ।
