ৰাজ্যত ভয়াৱহ ভাৱে বৃদ্ধি পাইছে ক’ভিড-১৯ ত আক্ৰান্ত ৰোগীৰ সংখ্যা। মঙলবাৰে গুৱাহাটীৰ গীতানগৰত অৱস্থিত গুৰুকুল গ্ৰামাৰ ছিনিয়ৰ ছেকেণ্ডাৰী স্কুলখন জিলা প্ৰশাসনে কণ্টেইনমেণ্ট জ’ন হিচাপে ঘোষণা ।
কামৰূপ মহানগৰ জিলা উপায়ুক্তৰ মন্তব্য মতে, স্বাস্থ্য বিভাগৰ তৰফৰ পৰা গীতানগৰত থকা গুৰুকুল গ্ৰামাৰ ছিনিয়ৰ ছেকেণ্ডাৰী স্কুলখনত মঙলবাৰে ক’ভিড ১৯ ৰ পৰীক্ষা সম্পন্ন কৰোৱা হৈছিল । ইয়াৰ পিছতেই গীতানগৰত থকা গুৰুকুল গ্ৰামাৰ ছিনিয়ৰ ছেকেণ্ডাৰী স্কুলখনৰ কেইবাগৰাকীও শিক্ষক ক’ভিডত আক্ৰান্ত হোৱাৰ তথ্য প্ৰকাশ পাইছে ৷ ইয়াৰ পিছতেই তাৎক্ষণিক ভাৱে কামৰূপ মহানগৰ জিলা প্ৰশাসনে এই সিদ্ধান্ত গ্ৰহণ কৰিছে ।
উল্লেখ্য যে, গীতানগৰত থকা গুৰুকুল গ্ৰামাৰ ছিনিয়ৰ ছেকেণ্ডাৰী স্কুলখনৰ ১৪৪ গৰাকীৰ ক’ভিড পৰীক্ষা কৰাৰ পিছত ৩০ গৰাকীৰ দেহত ধৰা পৰে এই ভাইৰাছ। গুৰুকুল গ্ৰামাৰ ছিনিয়ৰ ছেকেণ্ডাৰী স্কুলৰ বৰ্তমান সকলো অফলাইন পাঠদান বন্ধ ৰখা হৈছে ।
ইপিনে শেহতীয়াভাৱে স্বাস্থ্য বিভাগৰ তথ্য অনুসৰি, সোমবাৰৰ দিনটোত ৰাজ্যত নতুনকৈ ৬,৯৮২ গৰাকী লোক ক’ভিডত আক্ৰান্ত হৈছে । ইয়াৰে ১,৪৯১ গৰাকী লোক গুৱাহাটী মহানগৰীৰ বুলি জানিব পৰা গৈছে।