ক’ভিড : বিগত ২৪ ঘণ্টাত ৰাজ্যত আক্ৰান্ত ৮৩৩৯ জন

সম্প্ৰতি সমগ্র ৰাজ্যত ভয়াৱহ ৰূপত বৃদ্ধি পাবলৈ ধৰিছে কভিডত আক্রান্ত লোকৰ সংখ্যা। বিশেষকৈ মহানগৰীত আক্ৰান্তৰ সংখ্যা ভয়াৱহ ৰূপত বৃদ্ধি পাইছে।
বুধবাৰে স্বাস্থ্যমন্ত্ৰী কেশৱ মহন্তই টুইটাৰযোগে প্ৰকাশ কৰে বৰ্তমানৰ ক’ভিড-১৯ ৰ পৰিস্থিতিৰ তথ্য।
এই তথ্য অনুসৰি ৰাজ্যত বৰ্তমান ক’ভিড-১৯ ত আক্ৰান্তৰ সংখ্যা ৮৩৩৯ গৰাকী ৷ সৰ্বমুঠ ক’ভিড-১৯ ত আক্ৰান্তৰ হাৰ ১২.৮৯ শতাংশ ৷ লগতে ক’ভিড-১৯ টেষ্ট সম্পন্ন হৈছে ৬৪,৬৯৯ গৰাকীৰ ৷ ইয়াৰ ভিতৰত কামৰূপ মহানগৰীত ১৯২৯ জন লোক ক’ভিড-১৯ ত আক্ৰান্ত হয় ৷ ইপিনে ৯৪.৩৯ শতাংশ লোকে ক’ভিডৰ পৰা আৰোগ্য লাভ কৰিছে ৷ লগতে বিগত ২৪ ঘণ্টাত ক’ভিডত আক্ৰান্ত হৈ ১৫ জন লোকৰ মৃত্যু হৈছে ৷
শেহতীয়াকৈ কামৰূপ মহানগৰত ক’ভিডৰ ভয়াৱহতা যথেষ্ট হাৰত বৃদ্ধি হৈছে ৷ কেৱল কামৰূপ মহানগৰতেই ১১,৯৫৫ গৰাকী লোক ক’ভিডত আক্ৰান্ত হৈছে ৷ লগতে কাছাৰত ২৭৭৯ জন, ডিব্ৰুগড়ত ২,৭০৯ জন , যোৰহাটত ২,৪৯৯ জন কামৰূপ গ্ৰাম্যত ১,৯৩৪ জন লোক ক’ভিডত আক্ৰান্ত হৈছে ৷ ইয়াৰোপৰি ৰাজ্যৰ আন আন জিলাতো ক’ভিডৰ সংহাৰী ৰূপ অব্যাহত আছে ৷
ইতিমধ্যে প্ৰত্যেকখন জিলাতে ক’ভিড চিকিৎসাৰ বাবে সকলো ধৰণৰ ব্যৱস্থা গঢ়ি তোলা হৈছে ৷ অৱশ্যে এইবাৰ ক’ভিড ৰোগীসকলে সম্পূৰ্ণ নিজা খৰচত চিকিৎসা, খাদ্য আদি গ্ৰহণ কৰিব লাগিব ক’ভিড চিকিৎসালয়ত ৷
সম্প্ৰতি ৰাজ্যৰ চিনেমা হল, পাৰ্ক, শ্বপিং ম’লৰ লগতে ৰাজহুৱা স্থানত মাস্ক পিন্ধাতো বাধ্যতামূলক কৰিছে ৷ ইফালে ৰাজ্যৰ বিভিন্ন প্ৰান্তৰ বহুকেইখন বিদ্যালয় আৰু মহাবিদ্যালয়ত ক’ভিডত আক্ৰান্তৰ পৰিমাণ বৃদ্ধি হোৱাৰ বাবে কণ্টেইনমেণ্ট জ’ন ঘোষণা কৰিছে ৷