সোমবাৰে সন্ধিয়া কোকৰাঝাৰৰ পৰা গ্ৰেপ্তাৰ কৰা গুজৰাটৰ কংগ্ৰেছ বিধায়ক জিগনেশ মেৱানীক মঙলবাৰে বৰপেটা মুখ্য ন্যায়িক দণ্ডাধীশৰ আদালতত হাজিৰ কৰোৱা হয় ৷ আৰক্ষীৰ কটকটীয়া নিৰাপত্তা বেস্তনীৰ মাজতেই কংগ্ৰেছৰ বিধায়ক তথা দলিত নেতাগৰাকীক বৰপেটা মুখ্য ন্যায়িক দণ্ডাধীশৰ আদালত চৌহদলৈ অনা হয় ৷
উল্লেখ্য যে,সোমবাৰে কোকৰাঝাৰত ৰুজু হোৱা গোচৰটোত কংগ্ৰেছৰ বিধায়কগৰাকীয়ে জামিন লাভ কৰিলে ৷ কিন্তু তাৰ পাচতেই আকৌ বৰপেটাৰোড থানাত ৰুজু হোৱা আন এটা গোচৰৰ ভিত্তিত গ্ৰেপ্তাৰ কৰা হয় জিগনেশ মেৱানীক ৷ কোকৰাঝাৰ জিলা কাৰাগাৰৰ পৰা কংগ্ৰেছৰ বিধায়কগৰাকীক পোনে পোনে বৰপেটা সদৰ থানালৈ লৈ অনা হৈছে ৷
ভাৰতীয় দণ্ডবিধি আইনৰ ২৯৪/৩২৩/৩৫৩/৩৫৪ নং ধাৰাত বৰপেটাৰোড আৰক্ষী থানাত ৰুজু হোৱা ৮১/২০২২ নং গোচৰৰ ভিত্তিত দ্বিতীয়বাৰৰ বাবে অসম আৰক্ষীয়ে গ্ৰেপ্তাৰ কৰে জিগনেশ মেৱানীক ৷ চলিত বৰ্ষৰ ২১ এপ্ৰিলত জিগনেশ মেৱানীৰ বিৰুদ্ধে এজন চৰকাৰী কৰ্মচাৰীক দায়িত্ব পালনত বাধা দিয়া আৰু এগৰাকী মহিলা আৰক্ষী বিষয়াক অশালীন ব্যৱহাৰ কৰাৰ অভিযোগত ৰুজু কৰা গোচৰৰ ভিত্তিতে বিধায়কগৰাকীক গ্ৰেপ্তাৰ কৰা হৈছে বুলি জানিব পৰা গৈছে ।
