ঘৰে ঘৰে প্ৰচাৰ অভিযান চলালে লুৰীণজ্যোতি গগৈয়ে

সমাগত গুৱাহাটী পৌৰ নিগমৰ নিৰ্বাচনত অসম জাতীয় পৰিষদৰ হৈ প্ৰতিদ্বন্দিতা আগবঢ়োৱা প্ৰাৰ্থীসকলৰ বাবে মঙলবাৰে ঘৰে ঘৰে প্ৰচাৰ চলোৱা অভিযানৰ শুভাৰম্ভনি কৰে দলৰ সভাপতি লুৰীণজ্যোতি গগৈয়ে ৷
পৌৰ নিগম নিৰ্বাচনৰ প্ৰচাৰ অভিযানৰ আৰম্ভণিৰ দিনটোতেই মঙলবাৰে দুপৰীয়া দলৰ বৃহৎ সংখ্যক কৰ্মী-সমৰ্থকক লগত লৈ গগৈয়ে ৫৫ নং ৱাৰ্ডৰ প্ৰাৰ্থী মিন্টু ৰাজবংশীৰ হৈ নুনমাটি বিজয়নগৰ এলেকাত ১৫ টা পৰিয়ালৰ ঘৰলৈ যায় আৰু দলৰ হৈ ভোট ভিক্ষা কৰে ৷
উল্লেখ যে, বিজয়নগৰৰ পিচতে ৫৭ নং ৱাৰ্ডৰ প্ৰাৰ্থী পল্লৱী বৰা হাজৰিকাৰ হৈ শালবাৰীত প্ৰচাৰ চলায় গগৈয়ে ৷ ৩৫ নং ৱাৰ্ডৰ প্ৰাৰ্থী দিলীপ বড়োৰ হৈ চানমাৰী কলনিত প্ৰচাৰ চলোৱা কালত দলৰ সভাপতি লুৰীণজ্যোতি গগৈ বিশিষ্ট বুদ্ধিজীৱী ড° হীৰেন গোঁহাইৰ ঘৰতো উপস্থিত হয় ৷