২৮ ফেব্ৰুৱাৰী তাৰিখ সোমবাৰে পশ্চিম গুৱাহাটীৰ বৰাগাঁওস্থিত বিজ্ঞান আৰু প্ৰযুক্তিৰ উচ্চ অধ্যয়ন প্ৰতিষ্ঠান চমুকৈ আই.এ.এছ.এছ.টি. চৌহদত বিগত বছৰৰ দৰে এইবেলিও ৰাষ্ট্ৰীয় বিজ্ঞান দিৱস উদযাপন কৰা হয়। প্ৰতিষ্ঠান চৌহদত থকা ভাৰতৰ নোবেল বঁটা বিজয়ী বিজ্ঞানী চাৰ চি.ভি. ৰমনৰ প্ৰতিমূৰ্তিত পুষ্পাঞ্জলী প্ৰদানেৰে কাৰ্যসূচীৰ শুভাৰম্ভ কৰে আই.এ.এছ.এছ.টিৰ সঞ্চালক অধ্যাপক আশীষ কুমাৰ মুখাৰ্জীয়ে।
আনহাতে, বিজ্ঞান দিৱস উপলক্ষে অনুষ্ঠিত চমু অনুষ্ঠানত ভাষণ প্ৰসংগত অধ্যাপক মুখাৰ্জীয়ে ৰাষ্ট্ৰীয় বিজ্ঞান দিৱস উদযাপনৰ তাৎপৰ্য দাঙি ধৰি এইবোৰৰ বিজ্ঞান দিৱসৰ মূল বাণী “Integrated Approach in S & T Sustainable Future” সম্পৰ্কেও ব্যক্ত কৰে । তেনেদৰে বিজ্ঞান দিৱসৰ লগত সংগতি ৰাখি অনুষ্ঠিত সভাত নিমন্ত্রিত অতিথি হিচাপে তেজপুৰ বিশ্ববিদ্যালয়ৰ ৰসায়ন বিজ্ঞান বিভাগৰ অধ্যাপক নাচৰিন এছ. ইছলাম আৰু গণিত বিজ্ঞান বিভাগৰ অধ্যাপক নয়নদ্বীপ ডেকা বৰুৱা উপস্থিত থাকি বিজ্ঞান দিৱসৰ মূল বাণীৰ ওপৰত বাখ্যা আগবঢ়ায়।
ইয়াৰ উপৰিও দিৱসৰ লগত সংগতি ৰাখি বিজ্ঞান বিষয়ক কুইজ আৰু পোষ্টাৰ প্ৰতিযোগিতা অনুষ্ঠিত হয় । তেনেদৰে প্ৰাচীৰ পত্ৰিকাও উন্মোচন কৰা হয়। বিয়লি অনুষ্ঠিত সামৰণি অনুষ্ঠানত বিজয়ী প্ৰতিযোগী সকলক বঁটা বিতৰণ কৰে সঞ্চালক অধ্যাপক আশীষ কুমাৰ মুখাৰ্জীয়ে। আনহাতে, কাৰ্যসূচীত ৰাজ্যৰ বিভিন্ন প্ৰান্তৰ শিক্ষানুষ্ঠানৰ নৱম আৰু দশম শ্ৰেণীৰ প্ৰায় ৪০০ গৰাকী ছাত্ৰ-ছাত্ৰী উপস্থিত থাকে।
