টীয়কৰ জগদুৱাৰত জগদুৱাৰ যুৱ সংঘৰ উদ্যোগত তথা স্থানীয় ৰাইজৰ সহযোগত জগদুৱাৰস্থিত সিংহযুৱক ললিত চন্দ্ৰ ৰাজখোৱা সোঁৱৰণী নাট্য মন্দিৰত আজি এদিনীয়াকৈ অনুষ্ঠিত কৰা হৈছে ৰঙালী বিহু সন্মিলন। কাৰ্যসূচী অনুসৰি পুৱা জগদুৱাৰ ৰঙালী বিহু সন্মিলনৰ সভাপতি অনিল শৰ্মাই পতাকা উত্তোলনেৰে অনুষ্ঠানৰ শুভাৰম্ভ কৰে।তাৰ পাছতে স্মৃতি তৰ্পণ কাৰ্যসূচী গ্ৰহণ কৰা হয়।
স্মৃতি তৰ্পণৰ পাছতেই পৰম্পৰা ৰক্ষা কৰি কণী যুঁজ, পিঠাপনা প্ৰতিযোগিতা চিত্ৰাংকণ আৰু ৰচনা প্ৰতিযোগিতাও অনুস্থিত কৰা হৈছে ।ইপিনে বিয়লি আমন্ত্ৰিত কেইবাটাও হুঁচৰি দলৰ হুঁচৰি প্ৰদৰ্শনৰ লগতে মৌ কুঁৱৰী,বিহুৱতী বৰবিহুৱতী আৰু জেং বিহু প্ৰতিযোগিতা অনুষ্ঠিত কৰা হ’ব বুলি জানিবলৈ দিছে উদ্যোক্তাসকলে।
উল্লেখযোগ্য যে ১৯৭৬ চনৰ পৰা নিৰবিচ্চিন্নভাৱে উক্ত অঞ্চলত আজি পৰ্যন্ত অনুস্থিত কৰি অহা ঐতিহাসিক বিহু সন্মিলনভাগিৰ প্ৰতি অসম চৰকাৰে সন্মান প্ৰদৰ্শন কৰি যি অনুদান আগবঢ়াইছে সেই অনুদানেৰেই এইবাৰ ৰাইজৰ পৰা দান বৰঙনি গ্ৰহণ নকৰাকৈ দিনযোৰা কাৰ্যসূচী অনুস্থিত কৰা হৈছে বুলি মন্তব্য প্ৰকাশ কৰিছে উদ্যোক্তা মণ্ডলীয়ে।লগতে ৰাজ্যৰ মুখ্যমন্ত্ৰীৰ এনে সিদ্ধান্তক ধন্যবাদ আৰু কৃতজ্ঞতা জনাই আগলৈও এনেদৰে কৃষ্টি-সংস্কৃতি ৰক্ষাৰ স্বাৰ্থত চৰকাৰখনে ইতিবাচক পদক্ষেপ গ্ৰহণ কৰি যাব আৰু এই পদক্ষেপে অসমত চান্দা সংস্কৃতি নাইকীয়া কৰিব বুলি আশা প্ৰকাশ কৰিছে সকলোৱে।
