আজিৰে পৰা বিশ্ব ঐতিহ্য ক্ষেত্ৰ কাজিৰঙা ৰাষ্ট্ৰীয় উদ্যানত আৰম্ভ হৈছে এশিঙীয়া গঁড়ৰ গণনা। ২৬ মাৰ্চৰ পৰা ২৮ মাৰ্চ তাৰিখেলৈকে উদ্যানখনত সম্পন্ন হ’ব ১৪ সংখ্যক এই গঁড় গণনা কাৰ্যসূচী।
উল্লেখ্যে যে,ইয়াৰ পূৰ্বে ২০১৮ চনত হৈছিল অসম গৌৰৱ এটা খর্গযুক্ত গঁড়ৰ গণনা ৷ উল্লেখ্য যে, বনকৰ্মী, বিশেষজ্ঞ আৰু স্বেচ্ছাসেৱকৰ সহায়ত সম্পন্ন কৰা হৈছে এই গণনা।
শেহতীয়াকৈ ২০১৮ বৰ্ষত চলা গণনাত কাজিৰঙা ৰাষ্ট্ৰীয় উদ্যানত ২৪১৩ টা গঁড়ৰ সংখ্যা পোৱা গৈছিল। উদ্যান কৰ্তৃপক্ষই জনোৱা অনুসৰি এইবাৰৰ গঁড়ৰ গণনাৰ বাবে উদ্যানখনক ৮৪ টা কম্পার্টমেণ্টত ভাগ কৰা হৈছে ৷
ইপিনে, শনিবাৰে প্ৰথম দিনটোত ডিফলু নদীৰ দক্ষিণ অংশত কঁহৰা,বাগৰি আৰু বুঢ়াপাহাৰ বনাঞ্চলৰ মুঠ ৪৮ টা কম্পার্টমেণ্টত আৰু দ্বিতীয় দিনা ডিফলু নদীৰ উত্তৰ দিশে অগৰাতলি আৰু বুঢ়াপাহাৰ বনাঞ্চলৰ বাকী থকা ৩৬ টা কম্পার্টমেণ্টত গণনাকার্য চলোৱা হ’ব ৷
আনহাতে, ২৮ মাৰ্চ তাৰিখে সন্দেহ থকা অঞ্চলত পুনৰ গণনা কৰা হব। এই গণনাকার্যৰ বাবে মুঠ ৬৩ গৰাকী বিশেষজ্ঞক আমন্ত্ৰণ কৰিছে কাজিৰঙা উদ্যান কর্তৃপক্ষই ৷ গণনা কাৰ্যসূচী যাতে সূচাৰুৰূপে সম্পন্ন কৰিব পৰা যায় সেই শুকুৰবাৰৰ দিনটোত কহঁৰাৰ পৰমানন্দ লাহন প্ৰেক্ষাগৃহত এখনি বিশেষ সভাৰ আয়োজন কৰা হয়। উল্লেখ্যে যে, ১৯৬৫ চনত পোন প্ৰথমবাৰৰ বাবে ৰাষ্ট্ৰীয় উদ্যানখনত অনুষ্ঠিত হৈছিল গঁড় গণনা কাৰ্যসূচী।
