শিৱসাগৰ জিলাৰ আইন-শৃংখলা পৰিস্থিতিক লৈ উদ্বেগৰ মাজতে অতিৰিক্ত জিলা দণ্ডাধীশ বিতুপন নেওগে বৃহস্পতিবাৰে চিআৰপিচিৰ ১৪৪ ধাৰা জাৰি কৰে। পৰৱৰ্তী জাননী নোপোৱালৈকে এই নিষেধাজ্ঞাসমূহ বলবৎ থাকিব বুলি জানিব পৰা গৈছে ।
জিলা প্ৰশাসনে অসামাজিক আৰু উগ্ৰপন্থী কাৰ্যকলাপ, গুলীচালনা, হত্যা, অপহৰণ বা ধন দাবীৰ সম্ভাৱনা ৰখাৰ কথা উল্লেখ কৰি দুচকীয়া বাহনত পিলিয়ন ৰাইডিং নিষিদ্ধ কৰিছে। অৱশ্যে,৬০ বছৰৰ অধিক বয়সৰ লোক, ১২ বছৰৰ তলৰ শিশু, মহিলা, চৰকাৰী বিষয়া আৰু আৰক্ষী কৰ্মীসকলক নিষেধাজ্ঞাৰ পৰা ৰেহাই দিয়া হৈছে।
প্ৰশাসনে ৫০ মাইক্ৰনতকৈ কম প্লাষ্টিকৰ কেৰি বেগৰ উৎপাদন আৰু বিক্ৰীনিষিদ্ধ কৰিছে। সমগ্ৰ জিলাখনত গুটখা পান মচলা আৰু অন্যান্য ধপাতজাত সামগ্ৰীৰ বিক্ৰী নিষিদ্ধ কৰা হৈছে।
উগ্ৰপন্থী কাৰ্যকলাপ আৰু অসামাজিক কাৰ্যকলাপ সংঘটিত হোৱা প্ৰতিহত কৰাৰ বাবে সতৰ্কতামূলক ব্যৱস্থা হিচাপে অসম-নাগালেণ্ড সীমান্তত নিশাৰ কাৰফিউ জাৰি কৰা হৈছে।
সন্ধিয়া ৬:০০ বজাৰ পৰা পুৱা ৬:০০ বজালৈ ৫ কিলোমিটাৰ ব্যাসাৰ্ধৰ ভিতৰত যিকোনো ব্যক্তি বা গোট আৰু মটৰ বাহনৰ চলাচল নিষিদ্ধ। যদি কোনো ব্যক্তিয়ে নিষিদ্ধ আদেশ উলংঘা কৰে, উলংঘনকাৰীসকলৰ বিৰুদ্ধে আইপিচিৰ ধাৰা ১৮৮-ৰ অধীনত ব্যৱস্থা গ্ৰহণ কৰা হ’ব।
