এটা বিষয়কলৈ এতিয়া ৰাজ্যত তোলপাৰ লাগিছে। অসম চৰকাৰৰ মাধ্যমিক শিক্ষা বিভাগৰ দ্ৰুতপাঠত স্বৰ্গদেউ চাওলুং ছ্যুকাফাক অৱজ্ঞা কৰাৰ অভিযোগ উত্থাপিত হৈছে। বিশেষকৈ ছ’চিয়েল মিডিয়াত ইয়াক লৈ তুমুল বিতৰ্কৰ সূত্ৰপাত হোৱা দেখিবলৈ পোৱা গৈছে।
উল্লেখনীয়ভাৱে অসম ৰাজ্যিক পাঠ্যপুথি প্ৰণয়ন আৰু প্ৰকাশন নিগম লিমিটেডে প্ৰকাশ কৰা নৱম আৰু দশম শ্ৰেণীৰ দ্ৰুতপাঠ ‘বৈচিত্ৰ্যময় অসম’ত ৬০০ বছৰীয়া আহোম ৰাজশাসনৰ প্ৰতিষ্ঠাতা চাওলুং ছ্যুকাফাক নস্যাৎ কৰাৰ অভিযোগ কৰিছে একাংশই।
১২২৮ খ্ৰীষ্টাব্দতে বৰ অসমৰ ভেটি তথা বৃহত্তৰ অসমীয়া জাতি গঠন প্ৰক্ৰিয়া আৰম্ভ কৰা স্বৰ্গদেউ চাওলুং ছ্যুকাফাৰ নাম আৰু অৱদান দ্ৰুতপাঠখনৰ পৰিশিষ্টত উল্লেখ নথকাত প্ৰতিক্ৰিয়া প্ৰকাশ কৰিছে বিভিন্নজনে।
উল্লেখ্য যে, অসম চৰকাৰৰ মাধ্যমিক শিক্ষা বিভাগৰ অসম মাধ্যমিক শিক্ষা পৰিষদে প্ৰস্তুত কৰি উলিওৱা ‘বৈচিত্ৰ্যময় অসম’ নামৰ দ্ৰুতপাঠখনৰ ১৫৪ নং পৃষ্ঠাত মুদ্ৰিত পৰিশিষ্টত বৃহত্তৰ অসমৰ হোতা হিচাপে মহাপুৰুষ শ্ৰীমন্ত শংকৰদেৱৰ পৰা সংগীত সূৰ্য ড° ভূপেন হাজৰিকালৈ বহুকেইগৰাকী মহাপুৰুষ-মণীষীৰ নাম উল্লেখ কৰা হৈছে যদিও বৰ অসমৰ প্ৰতিষ্ঠাতা,জাতি জনগোষ্ঠীৰ সমন্বয়ৰ প্ৰতীক তথা বৃহত্তৰ অসমীয়া জাতিৰ ভেটি গঢ়োঁতা স্বৰ্গদেউ ছ্যুকাফাৰ নাম উল্লেখ নথকাক লৈ প্ৰতিক্ৰিয়া প্ৰকাশ কৰিছে বিভিন্নজনে।
মহাপুৰুষ শ্ৰীমন্ত শংকৰদেৱৰ জন্মৰ ২২১ বছৰৰ পূৰ্বেই বৃহত্তৰ অসমীয়া জাতি গঠন প্ৰক্ৰিয়া আৰম্ভ কৰা স্বৰ্গদেউ ছ্যুকাফাৰ নাম বৈচিত্ৰ্যময় অসমৰ পৰিশিষ্টত চক্ৰান্তমূলকভাৱে উল্লেখ নকৰি ৬০০ বছৰীয়া আহোম ৰাজত্বৰ ইতিহাস আৰু স্বৰ্গদেউ ছ্যুকাফাক পৰিকল্পিতভাৱে অৱজ্ঞা কৰাৰ অভিযোগ বিভিন্নজনৰ।
এতিয়া অসম চৰকাৰৰ শিক্ষা বিভাগ তথা শিক্ষামন্ত্ৰী ৰণোজ পেগুৰ এই ক্ষেত্ৰত প্ৰতিক্ৰিয়া কি হয় সেইয়া লক্ষ্যণীয় হ’ব বুলি বিভিন্নজনে মন্তব্য কৰিছে।
উল্লেখ্য যে, ৬০০ বছৰীয়া স্বৰ্ণিল ইতিহাস ৰচনা কৰি অসমীয়া জাতিক সমন্বয়ৰ ডোলেৰে বান্ধি জাতি গঠন প্ৰক্ৰিয়াৰ বুনিয়াদ গঢ়া চাওলুং ছ্যুকাফাৰ নাম দ্ৰুতপাঠৰ পৰিশিষ্টৰ পৰা ষড়যন্ত্ৰমূলকভাৱে আঁতৰোৱা হ’ল নেকি ? নে এইয়া শিক্ষা বিভাগৰ অনিচ্ছাকৃত ভুল সেইয়া শিক্ষামন্ত্ৰীৰ প্ৰতিক্ৰিয়াতহে স্পষ্ট হ’ ব বুলি ধাৰণা কৰা হৈছে। অসম চৰকাৰৰ শিক্ষা বিভাগে এই গুৰুতৰ আসোঁৱাহ দূৰীকৰণৰ বাবে কি তৎকালীন ব্যৱস্থা গ্ৰহণ কৰে সেয়াও হ’ব লক্ষ্যণীয়।
