আকৌ হাগ্ৰামা মহিলাৰীৰ কথা। বিটিআৰ প্ৰধান বুলি প্ৰমোদ বড়োৰ নামটো মুখস্থ হ’বলৈ নৌপাওতেই আকৌ হাগ্ৰামা মহিলাৰী বিটিআৰৰ প্ৰধান হৈ উভতিবলৈ যো-জা চলাইছে। এতিয়া ৰাজ্যত নিৰ্বাচনৰ পৰিৱেশ নিজম পৰিছে। নিৰ্বাচনত জিকাসকলে লাহে লাহে গা-টঙাই লৈ কামে কাজে হাত দিছে। তথাপি ৰাজ্যৰ ৰাজনীতি গৰম কৰিবলৈ আকৌ আহিছে হাগ্ৰামা মহিলাৰী।
বিটিআৰৰ ৰাইজ বা আপুনি মই বিচাৰিলেও কথা বেলেগ আছিল। এতিয়া বিটিআৰৰ মুঠ ২৩ জন পাৰিষদে বিচাৰিছে আকৌ হাগ্ৰামাই হওক বিটিচি চীফ। বৰ্তমানৰ ৪০ খন আসনৰ বিটিআৰত বিগত নিৰ্বাচনত সংখ্য়াগৰিষ্ঠ একক দল হৈয়ো ক্ষমতা এৰি দিবলগীয়া হৈছিল হাগ্ৰামাই। ১৭ খনকৈ খনকৈ আসন লাভ কৰিও 11 খন আসন পোৱা প্ৰমোদ বড়োৰ ইউপিপিএলক বিটিআৰ এৰি দিবলগীয়া হৈছিল।
পাতনি নেমেলি সৰল কৰি কৈছো। পুনৰ বিটিআৰ নিজৰ হাতলৈ নিবলৈ তৎপৰ হৈছে হাগ্ৰামা মহিলাৰীৰ বিপিএফ।
প্ৰমোদ বড়োক ওফৰাই বিটিআৰৰ মুখ্য কাৰ্যবাহী সদস্যৰ পদত পুনৰ বহিবলৈ সাজু হৈছে হাগ্ৰামা মহিলাৰী। বড়ো ৰাজনীতিৰ অভিকেন্দ্ৰ বিটিআৰৰ মুঠ ২৩ গৰাকী পাৰিষদে হাগ্ৰামা মহিলাৰীলৈ মুকলি সমৰ্থন আগবঢ়োৱাৰ প্ৰস্তুতি চলাইছে। অৰ্থাৎ প্ৰমোদ বড়োৰ অধ্যায় শেষ কৰিবলৈ সাজু হৈছে তেওঁৰেই একাংশ পাৰিষদ।
বিপিএফৰ পৰা বিজেপিলৈ যোৱা পৰিষদে উভতি অহাৰ মন মেলিছে। হাগ্ৰামাই বিপিএফলৈ উভতি আহিবলৈ দুৱাৰ খুলি দিলে আৰু কেতিয়াও দল ত্যাগ নকৰো বুলি শপতনামা দিবলৈও সাজু আছে একাংশ পাৰিষদ। এইবোৰ কথা আমি লাভ কৰা খবৰ নহয়। এইবোৰ ভাষ্য। বিধায়ক দুৰ্গা দাস বড়োৰ ভাষ্য।
এতিয়া ক’বলৈ লোৱাখিনি ভাষ্য নহয় খবৰ। দুমাহ পূৰ্বে বিপিএফ নেতৃবৰ্গই গুৱাহাটীলৈ আহি মুখ্যমন্ত্ৰী ড. হিমন্ত বিশ্ব শৰ্মাক সাক্ষাত্ কৰি এনেবোৰ কথাৰেই পূৰ্বানুমান দি গৈছিল। অনাগত সময়ত বিজেপিৰ লগত থাকি ৰাজ্যৰ উন্নয়নত মনোনিবেশ কৰাৰ ইচ্ছা ৰাজহুৱাকৈ কৈ গৈছিল। অৰ্থ এয়াই আছিল যে একাধিক বিজেপি পাৰিষদে প্ৰমোদ বড়োৰ পৰা সমৰ্থন স্থানান্তৰ কৰাৰ মন মেলিছে। কেৱল সেয়াই নহয়, দুই এটা দিনৰ ভিতৰতে ২৩ ৰ পৰা ২৫ জনীয়া পাৰিষদৰ তালিকা লৈ হাগ্ৰামা মহিলাৰীয়ে মুখ্যমন্ত্ৰী হিমন্ত বিশ্ব শৰ্মাক সাক্ষাত্ কৰিব। ৰাজ্যপালক সাক্ষাত্ কৰাৰ পূৰ্বে কথা পাতিব লাগিব মুখ্যমন্ত্ৰীৰ সৈতে। কাৰণ তেওঁলোকে হেনো হিমন্ত দাদাক বাইপাছ নকৰে। দাদাৰ পৰামৰ্শমতেই হাগ্ৰামা মহিলাৰীয়ে বিটিআৰৰ দায়িত্ব ল’ব।
বিপিএপৰ নেতা তথা বিটিআৰ চুক্তিৰ স্বাক্ষৰকাৰী ধীৰেণ বড়োৱেও কৈছে – শীঘ্ৰেই বড়ো ভূমিত পট পৰিৱৰ্তন হ’ব। আপাততঃ বড়োভূমিৰ ৰাজনীতিত সকলো ঠিকে থাকিলেও হিমন্ত-হাগ্ৰামাৰ ঘনিষ্ঠতা পুনৰ বৃদ্ধি পাইছে। মুখ্যমন্ত্ৰীয়ে কৈছে, বড়োভূমি একেই থাকিব। তথাপি ২৩-২৫ জনীয়া তালিকা দুই এদিনতে আহি পাবহি মুখ্যমন্ত্ৰীৰ কাৰ্যালয়। চীফৰ গাদীক কোন বহে আপোনালোকেও নজৰ ৰাখিব।
