গুৱাহাটীৰ পাঞ্জাবাৰীস্থিত শ্ৰীমন্ত শংকৰদেৱ কলাক্ষেত্ৰত PHD চেম্বাৰ অৱ কমাৰ্চ এণ্ড ইণ্ডাষ্ট্ৰী, NER চেপ্টাৰৰ উদ্যোগত ২০ জানুৱাৰীৰ পৰা মমেন্টাম নৰ্থ ইষ্ট, ২০২৩ (Momentum North East 2023) ৰ শুভাৰম্ভ হ’ব। ইয়াত চেন্ট্ৰেল ব্যুৰ’ অৱ কমিউনিকেশ্যন (CBC), গুৱাহাটীয়ে সেৱা, সুশাসন, দৰিদ্ৰৰ কল্যাণৰ ৮ বছৰ আৰু আজাদী কা অমৃত মহোৎসৱ বিষয়ক ফটো প্ৰদৰ্শনীৰ জৰিয়তে অংশগ্ৰহণ কৰিব।
CBCৰ এই প্ৰদৰ্শনীত চৰকাৰে যোৱা ৮ বছৰত গ্ৰহণ কৰা উন্নয়নমূলক আঁচনিসমূহ আৰু পদক্ষেপ তথা লাভ কৰা সাফল্যৰাজি সন্দৰ্ভত বিভিন্ন ফটো পেনেল থূপাই প্ৰদৰ্শন কৰা হ’ব। ইয়াৰোপৰি, ইয়াত অসমৰ স্বাধীনতা সংগ্ৰামীসকলৰ ফটো পেনেলসমূহো প্ৰদৰ্শনৰ ব্যৱস্থা কৰা হৈছে। অসম আৰু নাগালেণ্ডৰ মাননীয় ৰাজ্যপাল প্ৰফেছৰ জগদীশ মুখীয়ে এই কাৰ্য্যসূচী উদ্বোধন কৰিব। এই উদ্বোধনী অনুষ্ঠানত PHD চেম্বাৰ অৱ কমাৰ্চ এণ্ড ইণ্ডাষ্ট্ৰীৰ চিইঅ’ আৰু সচিব প্ৰধান কৰ্ণেল সৌৰভ সান্যাল, উদ্যোগ আৰু বাণিজ্য বিভাগৰ আয়ুক্ত ঐনম চৰণকুমাৰ সিং, IAS, অসম ঔদ্যোগিক উন্নয়ন নিগম লিমিটেডৰ পৰিচালন সঞ্চালক মানবেন্দ্ৰ প্ৰতাপ সিং, IAS উপস্থিত থাকিব।
এই অনুষ্ঠানৰ উদ্দেশ্য হৈছে ভিন্ন অংশীদাৰসকলৰ বাবে অংশীদাৰিত্ব আৰু নেটৱৰ্কিং মঞ্চ গঢ়ি তোলাৰ ক্ষেত্ৰত মধ্যৱৰ্তিতাৰ অৰ্থে কাম কৰা; অঞ্চলটোৰ সম্ভাৱনা, উপলব্ধ ব্যৱসায়িক সুযোগৰাজি আৰু বিনিয়োগ তথা বিকাশৰ সুযোগ সম্পৰ্কে অন্বেষণ কৰা। মমেন্টাম নৰ্থ ইষ্টে স্থানীয় যুৱক-যুৱতী, মহিলা, বেচৰকাৰী সংস্থা আৰু উন্নয়ন সংস্থাসমূহক ৰাষ্ট্ৰীয় পৰ্য্যায়ৰ প্ৰতিষ্ঠান, উদ্যোগ, বিশেষজ্ঞ আৰু বিষয়াসকলৰ সৈতে মত-বিনিময়ৰ সুযোগ প্ৰদান কৰিব। এই তিনি-দিনীয়া কাৰ্য্যসূচীত CBCৰ ষ্টলত নৃত্য, নাট, কুইজ, আকস্মিক বক্তৃতা আদি অনুষ্ঠিত কৰাৰ লগতে অসমৰ সংস্কৃতি আৰু পৰম্পৰাক চিত্ৰিত কৰা লোকগীত আৰু লোকনৃত্যৰ দৰে সাংস্কৃতিক অনুষ্ঠানৰো আয়োজন কৰা হৈছে। এই কাৰ্য্যসূচীত CBCৰ সাংস্কৃতিক শিল্পীসকলেও বিভিন্ন নৃত্য ৰূপ আৰু সংগীতানুষ্ঠান পৰিৱেশন কৰিব।
২০ জানুৱাৰী, ২০২৩ ৰ পুৱা ১১ বজাত কলাক্ষেত্ৰৰ শ্ৰী মাধৱদেৱ আন্তঃৰাষ্ট্ৰীয় প্ৰেক্ষাগৃহত এই কাৰ্য্যসূচীৰ উদ্বোধনী অনুষ্ঠান অনুষ্ঠিত হ’ব আৰু প্ৰদৰ্শনী ষ্টল ২০ জানুৱাৰীৰ পৰা ২২ জানুৱাৰীলৈকে দৰ্শনাৰ্থীসকলৰ বাবে মুকলি থাকিব।
