শিৱসাগৰৰ প্ৰাক্তন শিক্ষা বিষয়া আনোৱাৰ হুছেইনক যোৱা নিশা শিৱসাগৰ আৰক্ষীয়ে আটক কৰাক লৈ শিৱসাগৰ জিলাত তীব্ৰ প্ৰতিক্ৰিয়াৰ সৃষ্টি হৈছে৷ অসম নৱনিৰ্মাণ সেনা নামৰ এক সংগঠনে শিৱসাগৰ জিলাৰ গৌৰীসাগৰ থানাত ২০১৯ চনৰ নৱেম্বৰ মাহত জিলাখনত শিক্ষক নিযুক্তিৰ ক্ষেত্ৰত বিগত শতিকাৰ নব্বৈ দশকত হোৱা অনিয়ম সন্দৰ্ভত দাখিল কৰা এক এজাহাৰৰ ভিত্তিত শিৱসাগৰ আৰক্ষীয়ে ১৩৬৯নং এক গোচৰ ৰুজু কৰি তদন্ত প্ৰক্ৰিয়া অব্যাহত ৰাখিছিল৷
আৰক্ষীয়ে নৱনিৰ্মাণ সেনাৰ অভিযোগৰ ভিত্তিত বাবুল হুছেইন নামৰ এজন শিক্ষকক সোধা-পোছাৰ বাবে আটক কৰি নিযুক্তি সন্দৰ্ভত বহু বিস্ফোৰক তথ্য লাভ কৰিছিল৷ আৰক্ষীয়ে আটক কৰা বাবুল হুছেইন নামৰ ব্যক্তিগৰাকীয়ে ২৫ জানুৱাৰী, ১৯৯৬ চনত শিৱসাগৰ জিলাত সহকাৰী শিক্ষকৰূপে নিযুক্তি লাভ কৰিছিল৷ কিন্তু আচৰ্যজনক ভাৱে নিযুক্তিৰ সময়ত তেওঁৰ বয়স আছিল মাত্ৰ ১৭ বছৰ ২৪ দিন৷ চৰকাৰী চাকৰি পোৱাৰ নূন্য়তম বয়স নোহোৱা সত্ত্বেও বাবুলে চৰকাৰী চাকৰিত নিযুক্তি লাভ কৰাক লৈ আৰু উক্ত নিযুক্তি পত্ৰত শিক্ষা বিষয়া আনোৱাৰ হুছেইনৰ স্বাক্ষৰ থকাক লৈ যোৱা নিশা শিৱসাগৰ আৰক্ষীয়ে আনোৱাৰ হুছেইনৰ লগতে বাবুল হুছেইনক আটক কৰে৷
জয়সাগৰ আৰক্ষী থানাত প্ৰাথমিক তদন্ত সম্পন্ন কৰাৰ পাছত আনোৱাৰ হুছেইন আৰু বাবুল হুছেইনক শিৱসাগৰ আৰক্ষীয়ে আজি পুৱা পুনৰ জেৰাৰ বাবে শিৱসাগৰ সদৰ থানালৈ লৈ যায়৷ আনহাতে, এই ঘটনাৰ পাছতে আনোৱাৰ হুছেইনৰ লগতে তেওঁৰ পত্নী চিলভিয়া বেগমে নব্বৈৰ দশকত সংঘটিত নিয়োগ কেলেংকাৰিক লৈ কেতবোৰ বিস্ফোৰক তথ্য সদৰী কৰিছে৷
তেতিয়াৰ অবিভক্ত শিৱসাগৰ জিলাৰ কংগ্ৰেছ আৰু অগপ দলৰ নেতাৰ ৰাজনৈতিক হেঁচাত বিভিন্ন নিযুক্তিসমূহ দিবলৈ বাধ্য হোৱা বুলি সাংবাদিকৰ আগত সদৰী কৰে আৰক্ষীৰ জালত পৰা প্ৰাক্তন শিক্ষা বিষয়া আনোৱাৰ হুছেইনে৷ কংগ্ৰেছ নেতা প্ৰয়াত অঞ্জন দত্ত, প্ৰয়াত দেৱানন্দ কোঁৱৰ, হিৰণ্য কোঁৱৰ, শৰৎ বৰকটকী, প্ৰাক্তন মুখ্যমন্ত্ৰী হিতেশ্বৰ শইকীয়াৰ ভাতৃ প্ৰয়াত ৰোহিতেশ্বৰ শইকীয়া, অগপ নেতা তথা বৰ্তমানৰ আমগুৰি সমষ্টিৰ বিধায়ক প্ৰদীপ হাজৰিকা আদিকে ধৰি বহু ৰাজনৈতিক নেতা-পালিনেতাৰ নাম হুছেইন দম্পতীয়ে এই কেলেংকাৰিত সাঙোৰ খাই থকা বুলি বিস্ফোৰক ভাষ্য প্ৰদান কৰিছে৷
আজি আৰক্ষী থানাত প্ৰাক্তন শিক্ষা বিষয়াগৰাকীয়ে বিভিন্ন ৰাজনৈতিক নেতাই পৰামৰ্শ কমিটীৰ দ্বাৰা প্ৰেৰণ কৰা তালিকা অনুসৰি নিযুক্তি প্ৰদান কৰা বুলি দাবী কৰে৷ তেওঁ কয় যে নিযুক্তিৰ আগত প্ৰাৰ্থীৰ সকলো নথি-পত্ৰ সম্পূৰ্ণৰূপে পৰীক্ষা কৰিহে নিযুক্তি পত্ৰত চহী কৰা হৈছিল৷ কিন্তু বাবুল হুছেইনৰ ক্ষেত্ৰত নিযুক্তি দিয়াৰ সময়ত প্ৰদান কৰা প্ৰমাণপত্ৰ শুদ্ধ আছিল বুলি তেওঁ সদৰী কৰাৰ লগতে এইদৰে নথি কাৰ্যালয়ৰ কোনো কৰ্মচাৰীয়ে জালিয়াতি কৰাৰ সন্দেহ প্ৰকাশ কৰিছে আৰক্ষীৰ জালত পৰা শিক্ষা বিষয়াগৰাকীয়ে৷
আনহাতে, তেওঁৰ পত্নী চিলভিয়া বেগমে নব্বৈ দশকৰ সেইসময়ত ওপৰত উল্লিখিত ৰাজনৈতিক নেতাসকলে তেওঁলোকে প্ৰেৰণ কৰা তালিকা অনুসৰি নিযুক্তি দিবলৈ হেঁচা প্ৰদান কৰাৰ কথা সদৰী কৰে তেওঁ৷ তেতিয়াৰ মন্ত্ৰী-বিধায়কে প্ৰেৰণ কৰা এনে বহু তালিকা এতিয়াও মজুত থকা বুলিও দাবী কৰে মহিলাগৰাকীয়ে৷ যোৱানিশা আটক কৰা শিক্ষা বিষয়া আনোৱাৰ হুছেইন আৰু শিক্ষক বাবুল হুছেইনক আজি বিয়লি শিৱসাগৰ আৰক্ষীয়ে আনুষ্ঠানিকভাৱে গ্ৰেপ্তাৰ কৰি আদালতত হাজিৰ কৰে৷ ভাৰতীয় দণ্ডবিধিৰ ধাৰা ১২০[বি]য৪২০য৪৬৫য৪৬৮ ধাৰাত গ্ৰেপ্তাৰ কৰা দুই অভিযুক্তক আদালতে লক্ষণীয়ভাৱে ৰেহাই দিয়া পৰিলক্ষিত হয়৷ মুখ্য অভিযুক্ত আনোৱাৰ হুছেইনক আৰক্ষীৰ জিম্মালৈ প্ৰেৰণ কৰাৰ বিপৰীতে জে’ল হাজোতলৈ প্ৰেৰণ কৰাৰ বিপৰীতে বাবুল হুছেইনক জুভেনাইল ক’ৰ্টলৈ প্ৰেৰণ কৰে৷ ইফালে আনোৱাৰ হুছেইনৰ গ্ৰেপ্তাৰৰ লগে লগে শিৱসাগৰৰ একাংশ শিক্ষক আৰু কৰ্মচাৰীৰ লগতে ৰাজনৈতিক নেতাৰ মাজত হাহাকাৰ পৰিস্থিতিৰ সৃষ্টি হৈছে৷
বাবুল হুছেইনৰ গ্ৰেপ্তাৰৰ লগে লগে চাকৰিৰ নূ্যনতম বয়স নোহোৱাকৈ চৰকাৰী চাকৰি গ্ৰহণ কৰা বহুকেইজন শিক্ষক গ্ৰেপ্তাৰ হোৱাৰ পথ প্ৰশস্ত হৈ পৰিছে৷ যাৰ বাবে এতিয়া এনে শিক্ষকসকলে গ্ৰেপ্তাৰৰ পৰা হাত সাৰিবলৈ আদালতৰ জামিন ল’বলৈ তৎপৰ হৈ পৰিছে৷ বিষয় সন্দৰ্ভত আজি আমগুৰি সমষ্টিৰ বিধায়ক প্ৰদীপ হাজৰিকাই তেওঁৰ নাম লোৱাক লৈ প্ৰতিক্ৰিয়া প্ৰকাশ কৰি কয় যে নাম ল’লেই নহ’ব৷ সেই সময়ত চৰকাৰ কাৰ আছিল চাই লওক৷ আমাৰ অগপ দলৰ নিয়োগ ১৯৯৭-৯৮ চনত হৈছে৷ তাৰ আগৰ নিয়োগ কাৰ খবৰ লওক৷ যদি কোনোবাই অনিয়ম কৰি চাকৰি পাইছে তেন্তে তেওঁলোকৰ ওপৰত ব্যৱস্থা গ্ৰহণৰ পোষকতা কৰে বিধায়কগৰাকীয়ে৷ উল্লেখযোগ্য যে অভিযুক্ত আনোৱাৰ হুছেইন শিৱসাগৰ জিলাৰ প্ৰাথমিক শিক্ষা বিষয়াৰূপে ১৯৯৩ চনৰ পৰা ১৯৯৬ চনলৈকে নিয়োগ হৈ আছিল৷
