গুজৰাটৰ কংগ্ৰেছ বিধায়ক তথা দলিত নেতা জিগনেশ মেৱানীক অসম আৰক্ষীয়ে গ্ৰেপ্তাৰ কৰাৰ সন্দৰ্ভত বৃহস্পতিবাৰে গুৱাহাটীত প্ৰতিক্ৰিয়া প্ৰকাশ কৰে অসম প্ৰদেশ কংগ্ৰেছৰ সভাপতি ভূপেন বৰাই ৷ বিধায়ক তথা দলিত নেতা মেৱানীক বুধবাৰে নিশা গুজৰাটৰ পালামপুৰস্থিত আৱৰ্ত ভৱনৰ পৰা অসম আৰক্ষীয়ে গ্ৰেপ্তাৰ কৰে ৷
কোকৰাঝাৰৰ অনুপ কুমাৰ দে’য়ে কোকৰাঝাৰ থানাত দাখিল কৰা এক গোচৰৰ ভিত্তিত গ্ৰেপ্তাৰ কৰা হৈছে মেৱানীক । অভিযোগ কৰা অনুসৰি, মেৱানীয়ে প্ৰধানমন্ত্ৰী নৰেন্দ্ৰ মোডীৰ বিৰুদ্ধে কিছুদিন পূৰ্বৰে পৰা কেইবাটাও টুইট কৰিছিল ৷ যিয়ে ব্যাপক সমালোচনাৰ সন্মুখীন হোৱাৰ লগতে ৰাজনৈতিক মহলত প্ৰতিক্ৰিয়া সৃষ্টি কৰিছিল ৷মেৱানীৰ পোষ্টবোৰে এক নিৰ্দিষ্ট সম্প্ৰদায়ৰ জনসাধাৰণৰ শান্তি বিঘ্নিত কৰাৰ লগতে অপৰাধমূলক কাৰ্য সংঘটিত কৰিবলৈ উচতনি দিয়া বুলিও অনুপ কুমাৰ দে’য়ে এজাহাৰত উল্লেখ কৰে ৷
বৰাই সংবাদমেলত কয় যে, গুজৰাটৰ বলিষ্ঠ কংগ্ৰেছ নেতাগৰাকীক আৰক্ষীয়ে গ্ৰেপ্তাৰ কৰি দেশ তথা ৰাজ্যত পুলিচৰাজৰ প্ৰমাণ দিছে । অসম আৰক্ষীৰ এই দমন নীতিক অসম প্ৰদেশ কংগ্ৰেছ কমিটীয়ে কঠোৰ ভাষাৰে নিন্দা কৰিছে । ভূপেন বৰাই আৰু কয় যে, বিগত ১২ দিনত গুৱাহাটীত ১৩ টা মৃতদেহ ওলাইছে । অসম আৰক্ষীয়ে এই ক্ষেত্ৰত ঘটনাৰ তদন্ত কৰাত চৰম ব্যৰ্থতা প্ৰদৰ্শন কৰিছে । কিন্তু এটা টুইটৰ বিৰুদ্ধে বিজেপি নেতাৰ হেঁচাৰ বাবে জিগনেশ মেৱানীক অসম আৰক্ষীয়ে গুজৰাটত গৈ গ্ৰেপ্তাৰ কৰিছে ।তেওঁ লগতে কয় যে, গুজৰাটৰ কংগ্ৰেছ বিধায়ক জিগনেশ মেৱানীক অসম আৰক্ষীয়ে গ্ৰেপ্তাৰ কৰি কংগ্ৰেছ দলক ভয় খুৱাবলৈ বিচাৰিছে ।
জিগনেশ মেৱানীৰ দৰে বলিষ্ঠ কণ্ঠক বিজেপিয়ে ৰুদ্ধ কৰাৰ বাবে গ্ৰেপ্তাৰ কৰিছে । আমি দলৰ পৰা জিগনেশ মেৱানীক আইনীভাৱে মুকলি কৰাৰ বাবে তিনিগৰাকী অভিজ্ঞ অধিবক্তাক কোকৰাঝাৰলৈ প্ৰেৰণ কৰিছো । বৰ্তমান গুৱাহাটী পৌৰ নিগমৰ নিৰ্বাচনৰ বাবে গুৱাহাটীত ১৪৪ ধাৰা চলি থকাৰ বাবে আমি ৰাজপথত আন্দোলন কৰিব যোৱা নাই ।
তেওঁ শুকুৰবাৰৰ ভিতৰত জিগনেশ মেৱানীক আৰক্ষীয়ে মোকলাই নিদিলে অসম প্ৰদেশ কংগ্ৰেছে গুৱাহাটীত তীব্ৰ আন্দোলনৰ কাৰ্যসূচী গ্ৰহণ কৰাৰ হুংকাৰ দিয়ে । উল্লেখ্য যে, গুজৰাটত গ্ৰেপ্তাৰ কৰা জিগনেশ মেৱানীক অসম আৰক্ষীয়ে বৃহস্পতিবাৰে পুৱা বিমানেৰে গুৱাহাটীলৈ আনে ৷ সম্প্ৰতি কোকৰাঝাৰলৈ নিয়া হৈছে বিধায়ক তথা দলিত নেতা জিগনেশ মেৱানীক ।
