অসম চৰকাৰৰ পৰিবহণ বিভাগৰ উদ্যোগত “পথ-সুৰক্ষা সপ্তাহ” উপলক্ষে মহানগৰীৰ খানাপাৰাত শুকুৰবাৰে এক বিনামূলীয়া চকু চিকিৎসা শিবিৰ আৰু বৃহস্পতিবাৰে জিলাখনৰ বিদ্যালয়সমূহৰ ছাত্ৰ-ছাত্ৰীৰ মাজত পথ-সুৰক্ষা বিষয়কএখন ছবিঅঁকা প্ৰতিযোগিতা অনুষ্ঠিত হয়৷ শুকুৰবাৰে এএছ জি চকু চিকিৎসালয় আৰু মহানগৰ পৰিবহণ সংস্থা( MTAG)ৰ সহযোগত অনুষ্ঠিত চকু চিকিৎসা শিবিৰত বিভিন্ন যান-বাহনৰ চালক হেণ্ডিমেন, পথচাৰিকে ধৰি কেইবাশতাধিক লোকে চকু পৰীক্ষা কৰি চিকিৎসকৰ পৰামৰ্শ গ্ৰহণ কৰে। চকু চিকিৎসা শিবিৰৰ লগত সঙ্গতি ৰাখি অনুষ্ঠিত এক সজাগতা অনুষ্ঠানত অংশগ্ৰহণ কৰি ৰাজ্যৰ সহকাৰী পৰিবহণ আয়ুক্ত গৌতম দাসে কয় যে মুখ্যমন্ত্ৰী ড° হিমন্ত বিশ্ব শৰ্মাই অসমক এখন দুৰ্ঘটনামুক্ত ৰাজ্য হিচাপে গঢ়ি তুলিবলৈ সৰ্বস্তৰতে ব্যাপক জনসচেতনতা অভিযানৰ বাবে জনোৱা আহ্বানলৈ ইতিমধ্যে সকলো শ্ৰেণীৰ ৰাইজে সহযোগিতা আগবঢ়াইছে। সেয়ে ৰাজপথত সকলো সময়তে সুৰক্ষিত হৈ থাকিবলৈ হ’লে যানবাহন চালককে ধৰি সকলো শ্ৰেণীৰ লোকেই শৰীৰৰ অনান্য ৰোগ ব্যাধিৰ লগতে সবল-শক্তিশালী চকুজুৰিৰ বাবেও সদাসতৰ্ক হৈ থাকিব লাগিব বুলি কয়।
পথ দুৰ্ঘটনাৰ বিভিন্ন কাৰণৰ কথা উল্লেখ কৰি সহকাৰী পৰিবহণ আয়ুক্ত গৰাকীয়ে কয় যে চকুজুৰিৰ সযত্ন পালন নকৰাৰ বাবেই কোনোবাই দূৰৰ, আন কোনোবাই ওচৰৰ বস্তু মনিব নোৱাৰে, কোনোবাই আকৌ ৰঙৰ ভিন্নতা মনিব নোৱাৰিও অচানক দৰ্ঘটনাত পতিত হয়। এনে সমস্যা চালকৰ উপৰি আনসকলৰ মাজতো দেখা দিব পাৰে বুলি কৈ সকলোকে সময়মতে চকুজুৰিৰ পৰীক্ষা আৰু চিকিৎসা কৰিবলৈ তেওঁ অনুৰোধ জনায়। আঞ্চলিক পৰিবহণ প্ৰাধিকাৰী ৰফিকুল ইছলামে চকু পৰীক্ষা শিবিৰত উপস্থিত থাকি কোনো চালকেই যাতে কোনো কাৰণতে অতিষ্ঠ আৰু উদিগ্নভাৱে গাড়ী চলায় নিজৰ লগতে আনকো বিপদত নেপেলায় তাৰ আহ্বান জনায় ৷ পৰিবহণ বিষয়া (প্ৰৱৰ্তক) হিমাংশু কুমাৰ দাসে চকুহালেই মানুহৰ মূল সম্পদ বুলি কৈ মানুহকে ধৰি বিনন্দীয়া এই পৃথিৱীখন হেপাঁহ পলুৱাই চাবলৈ হ’লে চকুৰ সঠিক পৰীক্ষা কৰি থাকিবলৈ কয়। সজাগতা অনুষ্ঠানটিত অংশগ্ৰহণ কৰি “অসমীয়া খবৰ” কাকতৰ কাৰ্যবাহী সম্পাদক বিশ্বজিত দাসে ব্যতিক্ৰমী বক্তব্য আগবঢ়াই কয় যে দুৰ্যোধনে গুৰু দোনাচাৰ্যক সদাই আপত্তি কৰি কৈছিল যে মোতকৈ আপুনি অৰ্জুনকহে বেছি ভালপায় কিয়? দোনাচাৰ্যই তেতিয়া পৰীক্ষা লবৰ বাবে এটা কাঠৰ চৰাই দি দুয়োকে লক্ষ্যভেদ কৰিবলৈ দিয়াত দুৰ্যোধনে চৰাইটোৰ লগতে বিভিন্ন দাল-পাত আদি দেখা পোৱা বুলি কোৱাৰ বিপৰীতে অৰ্জনে চৰাইৰ চকুটো দেখা পোৱা বুলি কোৱা কথাটো উল্লেখ কৰি মানুহৰ দৃষ্টিশক্তি প্ৰকৃততে কেনে হোৱা উচিত তাৰ আভাস দিয়ে। চকু পৰীক্ষা আৰু সজাগতা শিবিৰত এচিপি মনোজ লহকৰ, চিটিবাছ সন্থাৰ সম্পাদক বিপুল চন্দ্ৰ কলিতা, যানবাহন পৰিদৰ্শক জয়সিং ৰংফাৰ আদি উপস্থিত থাকি বিভিন্ন দিহা-পৰামৰ্শ আগবঢ়ায়।
ডা° সত্যেন ডেকাৰ নেতৃত্বত জেষ্ঠ চকু পৰীক্ষা বিশেষজ্ঞ বিদ্যা দেৱীৰ উপৰি এএছজি চকু চিকিৎসালয়ৰ দলে চকু পৰীক্ষা শিবিৰত উপস্থিত থাকি সকলোৰে চকু পৰীক্ষা কৰি সুচিকিৎসা প্ৰদান কৰে। ইফালে ছাত্ৰবস্থাৰ পৰাই সকলোকে পথসুৰক্ষা সজাগতাৰ প্ৰতি সচেতন কৰাৰ মানসেৰে বৃহস্পতিবাৰে হেঙেৰাবাৰীৰ অমৃত উদ্যানত আয়োজন কৰা ছবিঅঁকা প্ৰতিযোগিতাত মহানগৰীৰ বিভিন্ন বিদ্যালয়ৰ ডেৰ শতাধিক প্ৰতিযোগীয়ে অংশগ্ৰহণ কৰি “পথ-সুৰক্ষা জীৱন ৰক্ষা” ধ্বনি দি পৰিবহণ বিভাগৰ পথ সুৰক্ষা সপ্তাহলৈ ব্যাপক সহযোগিতা আগবঢ়াই ৷
