পশ্চিম ৰামচাৰাণী উচ্চ মাধ্যমিক বিদ্যালয়ত অসম মহিলা অভিযন্তা সন্থাৰ দুই কৰ্মকৰ্তাৰ গ্ৰন্থ দান
বিশ্ব পৰিবেশ দিৱসৰ লগত সংগতি ৰাখি ৰাখি অসম মহিলা অভিযন্তা সন্থা আৰু অসম প্ৰদুষণ নিয়ন্ত্ৰণ পৰিষদৰ যৌথ উদ্যোগত গুৱাহাটীৰ পশ্চিম প্ৰান্তৰ পশ্চিম ৰামচাৰাণী উচ্চ মাধ্যমিক বিদ্যালয়ৰ চৌহদত ৩ জুনত বিশ্ব পৰিবেশ দিৱস পালন কৰা হয় ৷ আনহাতে সিদিনা অসম মহিলা অভিযন্তা সন্থাৰ প্ৰতিষ্ঠাপক সভানেত্ৰী, বৰ্তমানৰ উপদেষ্টা, গুৱাহাটী গাৰ্লছ পলিটেকনিকৰ অৱসৰপ্ৰাপ্ত অধ্যক্ষ ৰীতা ৰাজখোৱা আৰু সন্থাৰ আন এগৰাকী উপদেষ্টা, বিশিষ্ট শিশু সাহিত্যক , বন্দিতা ফুকনে বিদ্যালয়ৰ ছাত্ৰ – ছাত্ৰী সকলৰ মানসিক উৎকৰ্ষ সাধন, শৈক্ষিক উত্তৰণৰ বাবে মুঠ সাতখন গ্ৰন্থ বিদ্যালয়ৰ গ্ৰন্থাগাৰত দান হিচাপে প্ৰদান কৰে। অনুভব পৰাশৰৰ সম্পাদনাত প্ৰকাশিত বন্দিতা ফুকনৰ গ্ৰন্থখন হল “বন্দিতা ফুকনৰ নিৰ্বাচিত শিশু উপন্যাস”। তেনেদৰে ৰীতা ৰাজখোৱাই দান দিয়া ছয়খন গ্ৰন্থৰ পাঁচখন হল তেওঁৰ স্বামী তথা অসম চৰকাৰৰ অৱসৰপ্ৰাপ্ত মুখ্য সচিব আৰু অৰুণাচল প্ৰদেশৰ প্ৰাক্তন ৰাজ্যপাল জ্যোতি প্ৰসাদ ৰাজখোৱাৰ। আনখন তেওঁৰ ককায়েক, বিশিষ্ট শিক্ষাবিদ দিলীপ কুমাৰ দত্তৰ।
জ্যোতি প্ৰসাদ ৰাজখোৱাৰ তিনিখন ইংৰাজী আৰু দুখন অসমীয়া। ইংৰাজী গ্ৰন্থ তিনিখন হল ক্ৰমে – SUKAPHA & his Times , Generalissimo Chilarai and his Times , আৰু Sankardeva : His life Preachings & Practices ( A historical Biography )। অসমীয়া গ্ৰন্থ দুখন হল – সংযুক্ত সৈন্য বাহিনীৰ সৰ্বাধিনায়ক চিলাৰায় আৰু তেওঁৰ সময়চোৱা , সৰু কালৰ কিছু কথা : পটভূমি যোৰহাট ( আত্মকথা – ১ )। তেনেদৰে দিলীপ কুমাৰ দত্তৰ গ্ৰন্থখন হল ফলি লোৱা বুৰঞ্জী। এই উপলক্ষে বিদ্যালয়ৰ অৱসৰপ্ৰাপ্ত শিক্ষক পবিত্ৰ বৰুৱাই সঞ্চালনা কৰা সভাখনত উপস্থিত সকলোকে আদৰণি জনায় সন্থাৰ সভানেত্ৰী ডঃ বিভা দাস শইকীয়াই। সভাত সন্থাৰ সম্পাদিকা অন্তৰা বৰুৱা , প্ৰতিষ্ঠাপক সভানেত্ৰী, উপদেষ্টা ৰীতা ৰাজখোৱা আৰু বন্দিতা ফুকন , বিদ্যালয়ৰ প্ৰধান শিক্ষক অশোক কুমাৰ কলিতাকে ধৰি বিদ্যালয়ৰ ছাত্ৰ – ছাত্ৰী , শিক্ষক – শিক্ষয়ত্ৰী, কৰ্মচাৰী উপস্থিত থাকে। বিদ্যালয়ৰ ফালৰ পৰা তেওঁলোকৰ গ্ৰন্থাগাৰত মূল্যৱান গ্ৰন্থ দান দিয়া বাবে ৰীতা ৰাজখোৱা আৰু বন্দিতা ফুকনক ধন্যবাদ জ্ঞাপন কৰা হয়।
