উত্তৰ-পূর্বাঞ্চলৰ প্রতি দেশৰ জনতাৰ দৃষ্টিভংগী এতিয়া সলনি হৈছে৷ উত্তৰ-পূর্বাঞ্চলক দেশৰ উল্লেখযোগ্য অঞ্চল হিচাপে গঢ়ি তুলিবলৈ ২০১৪ চনৰ পৰা প্রধানমন্ত্রী নৰেন্দ্র মোদীয়ে গুৰুত্ব দি অহাৰ পৰিপ্রেক্ষিতত এতিয়া আন ৰাজ্যৰ পৰা উত্তৰ-পূবলৈ জনতাৰ আগমন বৃদ্ধি পাব ধৰিছে বুলি মন্তব্য কৰিছে কেন্দ্রীয় জাহাজ, জল পৰিবহণ আৰু আয়ুস মন্ত্রী সর্বানন্দ সোণোৱালে৷ নৱবর্ষ আৰু ভোগালী বিহু উপলক্ষে গুৱাহাটীৰ ব্রহ্মপুত্র ৰাজ্যিক অতিথিশালাত আজি সাংবাদিকৰ সৈতে হোৱা মত-বিনিময় অনুষ্ঠানত অংশগ্রহণ কৰি কেন্দ্রীয় মন্ত্রীগৰাকীয়ে লগতে কয় যে প্রধানমন্ত্রীয়ে উত্তৰ-পূর্বাঞ্চলৰ মানৱ সম্পদ, জলসম্পদৰ সদ্ব্যৱহাৰৰ কথা কৈ অহাই নহয়, ইতিমধ্যে ইয়াৰ বাবে বহু আঁচনি গ্রহণ কৰিছে৷ প্রধানমন্ত্রীয়ে উত্তৰ-পূর্বাঞ্চলক অষ্টালক্ষ্মী আখ্যা দি ইয়াৰ পৰা আত্মনির্ভৰ ভাৰত গঢ়াৰ পদক্ষেপ লৈছে৷ ২০১৪ চনৰ পৰা বিগত ৭ বছৰে উত্তৰ-পূর্বাঞ্চলৰ উন্নয়নৰ বাবে নিৰন্তৰ লাগি থকাৰ কথা সদৰী কৰি কয় যে প্রচুৰ প্রাকৃতিক সম্পদেৰে ভৰপূৰ দেশৰ এই অঞ্চলটো আত্মনির্ভৰশীল হৈ উঠিবই লাগিব৷ আয়ুস আৰু জল পৰিবহণ মন্ত্র্যালয় দুটাৰ জৰিয়তে অসম তথা উত্তৰ-পূবৰ ৰাজ্যকেইখনৰ অর্থনৈতিক বুনিয়াদ শক্তিশালী কৰাৰ প্রচেষ্টা অব্যাহত থকাৰ কথা সদৰী কৰি লগতে জনায় যে ব্রহ্মপুত্রকে ধৰি প্রধান নৈসমূহৰ জলপথ বৃদ্ধি কৰি আমদানি আৰু ৰপ্তানি ব্যৱস্থা সুচল কৰাত গুৰুত্ব দিয়া হৈছে
ব্রহ্মপুত্র খননৰ জৰিয়তে গভীৰতা বৃদ্ধি কৰি শদিয়াৰ পৰা ধুবুৰীলৈ জাহাজ পৰিবহণ ব্যৱস্থাটো অধিক সুচল কৰাৰ আঁচনি লোৱাৰ কথা তেওঁ প্রকাশ কৰে৷ ২০১৬ চনত ১০৬টা নতুন ৰাষ্ট্রীয় জলপথ ঘোষণা কৰাৰ কথা সদৰী কৰি কয় যে বৰাকত ১৬টা, ধনশিৰিত ৩১টা, কপিলীত ৫৭টাৰ লগতে ১৬টাতকৈ অধিক নতুন ৰাষ্ট্রীয় জলপথ ব্যৱস্থা লোৱা হৈছে৷ পাণ্ডুত জাহাজ নির্মাণ কেন্দ্র স্থাপন হোৱাৰ পাছত অসমতেই জাহাজ মেৰামতি কৰাৰ পথ প্রশস্ত হৈ পৰিব বুলি মন্তব্য কৰি কয় যে পূর্বে জাহাজ মেৰামতিৰ বাবে কলকাতালৈ নিব লগা হৈছিল৷ কিন্তু এতিয়া পাণ্ডুত জাহাজ মেৰামতি কেন্দ্র স্থাপন হোৱাৰ পাছত মেৰামতিৰ বাবে হোৱা হাৰাশাস্তি দূৰ হৈ পৰিব বুলি সোণোৱালে আশা প্রকাশ কৰে৷ জল পৰিবহণ আৰু জাহাজ মন্ত্র্যালয়ৰ জৰিয়তে অসমৰ জল পৰিবহণ ব্যৱস্থা সুচল কৰি তোলাৰ লগতে আয়ুস মন্ত্র্যালয়ৰ জৰিয়তেই বিশেষ পদক্ষেপ গ্রহণ কৰাৰ কথা সদৰী কৰে৷ তেওঁ কয় যে কভিড-সৃষ্ট পৰিস্থিতিৰ সময়ত জনতাক সুষ্ঠ কৰি ৰাখিবৰ বাবে এই বিভাগটোৰ জৰিয়তে বিশেষ পদক্ষেপ লোৱা হৈছে৷ কভিড সংক্রমণৰ পৰা প্রতিৰোধ পাবৰ বাবে আয়ুস বিভাগৰ জৰিয়তে প্রস্তুত কৰা ঔষধ ৰাইজৰ মাজলৈ উলিয়াই দিয়া হৈছে আৰু ঔষধ ফলৱতী হোৱা বুলি ব্যৱহাৰকাৰীয়ে নির্দিষ্ট এপৰ জৰিয়তে প্রকাশ কৰিছে৷
প্রতিগৰাকী লোক সুষ্ঠ-সবল হৈ থাকিবৰ বাবে স্থানীয়ভাৱে উৎপাদিত আহাৰ তথা আয়ুস আহাৰ গ্রহণ কৰাৰ লগতে যোগাসন কৰিবলৈ তেওঁ আহ্বান জনায়৷ তেওঁ প্রাচীন পদ্ধতিৰে প্রস্তুত কৰা ঔষধ ব্যৱহাৰ কৰি আৰোগ্য হ’ব পাৰি বাবে প্রধানমন্ত্রী মোদীয়ে স্বাস্থ্য আৰু পৰিয়াল কল্যাণ মন্ত্র্যালয়ৰ সমান্তৰালকৈ আয়ুস মন্ত্র্যালয়ৰ ওপৰত গুৰুত্ব দিছে৷ কভিড আক্রান্ত লোকেআয়ুস ঔষধ ব্যৱহাৰ কৰি জটিল পৰিস্থিতিৰ মুখামুখি নোহোৱাকৈ সুৰক্ষা পাব পাৰে বুলিও মন্তব্য কৰে৷
