অসমৰ মুখ্যমন্ত্ৰীৰ ‘দুৰ্ঘটনামুক্ত অসম’ৰ সপোনক বাস্তৱ ৰূপ দিয়া আৰু অলপতে কামৰূপ মহানগৰ জিলা উপায়ুক্ত কাৰ্যালয়ত অনুষ্ঠিত জিলা পথ সুৰক্ষা সমিতিৰ সভাত গ্ৰহণ কৰা সিদ্ধান্ত সমূহ ৰূপায়ণ কৰি ৰাষ্ট্ৰীয় ঘাইপথত দুৰ্ঘটনাত আক্ৰান্ত লোকক তৎকালে নিকটবৰ্তী চিকিৎসালয়লৈ নিবৰ বাবে জিলা পথ সুৰক্ষা সমিতিৰ আহ্বান মৰ্মে ৰাষ্ট্রীয় ঘাইপথ প্ৰাধিকৰণৰ গুৱাহাটীস্থিত আঞ্চলিক কাৰ্যালয়ে তৎপৰতা আৰম্ভ কৰিছে।
উল্লেখযোগ্য যে দেশৰ আন ৰাজ্যৰ লগতে অসমতো ৰাষ্ট্ৰীয় ঘাইপথত দুৰ্ঘটনাৰ সংখ্যা বৃদ্ধি পাইছে। তেনেদৰে বৃদ্ধি পাইছে দুৰ্ঘটনাত আহত – নিহত লোকৰ সংখ্যায়ো। এনে ধৰণৰ ঘটনাক শেহতীয়াভাবে গুৰুত্ব সহকাৰে গ্ৰহণ কৰিছে ভাৰত চৰকাৰৰ পথ পৰিবহণ মন্ত্ৰণালয়ৰ অধীনৰ ৰাষ্ট্ৰীয় ঘাইপথ প্ৰাধিকৰণ কৰ্তৃপক্ষই। বিশেষকৈ ৰাষ্ট্ৰীয় ঘাইপথত দুৰ্ঘটনাত আহত লোকক যাতে তৎক্ষণাত নিকটবৰ্তী চিকিৎসালয়ত ভৰ্ত্তি কৰি জীৱন বচাব পাৰি তাৰ বাবে আহত লোকক চিকিৎসালয়লৈ প্ৰেৰণ কৰাৰ বাবে আৰম্ভ কৰিছে নতুন এম্বুলেঞ্চ সেৱা।
মহানগৰীৰ গড়চুক থানাত আনুষ্ঠানিক ভাবে মুকলি কৰা হয় নতুন এম্বুলেঞ্চ সেৱা। প্ৰথম পৰ্যায়ত এতিয়াৰে পৰা ৰাষ্ট্ৰীয় ঘাইপথ প্ৰাধিকৰণৰ তত্ত্বাৱধানত গড়চুক থানা আৰু সোণাপুৰ থানাৰ পৰা চলিব এই এম্বুলেঞ্চ সেৱা। ইফালে, ৰাষ্ট্ৰীয় ঘাইপথত দুৰ্ঘটনাত পতিত হোৱা লোকৰ সেৱাৰ্থে মুকলি কৰা হয় ১০০৩ নম্বৰৰ এটা নতুন হেল্পলাইন সেৱা । ১০৮ সেৱাৰ উপৰি ৰাইজে এতিয়াৰে পৰা ১০০০ লাভ কৰিব এম্বুলেঞ্চ সেৱা।
আনহাতে এই এম্বুলেঞ্চ সেৱা মুকলি অনুষ্ঠানত উপস্থিত থাকে কামৰূপ মহানগৰ জিলাৰ জিলা পৰিবহণ বিষয়াৰ ( পঞ্জীয়ন আৰু অনুজ্ঞাপত্ৰ ) অতিৰিক্ত দায়িত্ববাহী সহকাৰী পৰিবহণ আয়ুক্ত গৌতম দাস, জিলা পৰিবহণ বিষয়াদ্বয় হিমাংশু কুমাৰ দাস আৰু ৰফিকুল ইছলাম, অসম চৰকাৰৰ লোকনির্মাণ পথ বিভাগৰ গুৱাহাটী মহানগৰ পথ চক্ৰৰ অধীক্ষক অভিযন্তা হেমন্ত কুমাৰ ভৰালী , ৰাষ্ট্রীয় ঘাইপথ প্ৰাধিকৰণৰ গুৱাহাটীস্থিত কাৰ্যালয়ৰ প্ৰকল্প বিষয়া সুৰেশ কুমাৰ, দিছপুৰ ৰাজহ চক্ৰৰ চক্ৰ বিষয়া চিন্ময় নেওগ, মহানগৰ আৰক্ষীৰ সহকাৰী আৰক্ষী আয়ুক্তদ্বয় মনোজ লহকৰ আৰু অনুপজ্যোতি বৰাকে ধৰি কেবাজনো আৰক্ষী বিষয়া, পৰিবহণ বিভাগৰ কামৰূপ মহানগৰ জিলাৰ যানবাহন পৰিদৰ্শক জয়ছিং ৰংফাৰ, প্ৰৱৰ্তক পৰিদৰ্শক নিতু চেতিয়াকে ধৰি উপস্থিত থাকে ৰাষ্ট্ৰীয় ঘাইপথ প্ৰাধিকৰণৰ বিষয়ববীয়াসকল। আনহাতে এই সন্দৰ্ভত সহকাৰী পৰিবহণ আয়ুক্ত গৌতম দাসে সদৰি কৰা মতে ভাৰত চৰকাৰৰ নিয়মানুসৰি ৰাষ্ট্ৰীয় ঘাইপথত ৫০ কিঃমিঃ দূৰত্বৰ মূৰে মূৰে দুৰ্ঘটনাত আহত লোকক তৎকালীনভাবে নিকটৱৰ্তী চিকিৎসালয়লৈ নিবৰ বাবে একোখনকৈ এম্বুলেঞ্চ থাকিব লাগে। এতিয়া এই অসুবিধা সামান্য হলেও দূৰ হব বুলি গৌতম দাসে আশা ব্যক্তিকৰে। ইফালে পথ দুৰ্ঘটনা ৰোধৰ বাবে গড়চুক থানাত সজাগতামূলক বাটৰ নাট প্ৰদৰ্শন কৰা হয়। উল্লেখযোগ্য যে জিলা পথ সুৰক্ষা সমিতিয়ে ৰাষ্ট্রীয় ঘাইপথ প্ৰাধিকৰণ , লোকনির্মাণ পথ বিভাগকে ধৰি পথ সুৰক্ষাৰ লগত জড়িত বিভাগ – কৰ্তৃপক্ষৰ সহযোগত তিনি সপ্তাহৰ ভিতৰত কামৰূপ মহানগৰ জিলাৰ দুৰ্ঘটনাপ্ৰৱণ অঞ্চল সমূহ চিনাক্তকৰণৰ বাবে যুটীয়াভাবে এক জৰীপ চলাব।
