প্ৰধানমন্ত্ৰী নৰেন্দ্ৰ মোদীয়ে ১৯ নৱেম্বৰত আনুষ্ঠানিক ভাৱে মুকলি কৰিব অৰুণাচল প্ৰদেশৰ ৰাজধানী চহৰ ইটানগৰৰ পৰা প্ৰায় ১৯ কিলোমিটাৰ নিলগৰ পাপুমপাৰে জিলাৰ হোলোংগীত ভাৰতীয় বিমানবন্দৰ প্ৰাধিকৰণে নতুনকৈ নিৰ্মাণ কৰা বিমানবন্দৰটো। ইতিমধ্যে অৰুণাচল প্ৰদেশ চৰকাৰে বিমানবন্দৰটোক দয়ী পলো হিচাপে নামাকৰণ কৰিছে আৰু এইটোৱেই হব অৰুণাচল প্ৰদেশৰ ৰাজধানী চহৰৰ ওচৰত নিৰ্মাণ কৰা প্ৰথমটো বিমানবন্দৰ। বিমানবন্দৰৰ পৰা বিমান সেৱা আৰম্ভ হোৱাৰ পাছত অৰুণাচল প্ৰদেশত বিমান যাতায়তৰ ক্ষেত্ৰখনত এক পৰিবৰ্তন হোৱাটো নিশ্চিত।
উল্লেখযোগ্য যে উত্তৰ পূৱৰ ৰাজ্য সমূহৰ ৰাজধানী চহৰ সমূহৰ সৈতে পোনপটীয়াকৈ বিমান চলাচল কৰাৰ বাবে গ্ৰহণ কৰা আঁচনিৰ অংশ হিচাপে অৰুণাচল প্ৰদেশৰ ৰাজধানী ইটানগৰৰ সমীপৰ কোনো সুবিধাজনক স্থানত এটা পৰিবেশ অনুকূল বিমানবন্দৰ নিৰ্মাণৰ পৰিকল্পনা হাতত লোৱা হৈছিল। সেই অনুসৰি ২০১৮ চনত ইটানগৰৰ পৰা প্ৰায় ১৯ কিলোমিটাৰ নিলগৰ পাপুমপাৰে জিলাৰ হোলোংগী গাঁৱত বিমানবন্দৰ নিৰ্মাণ কৰাৰ বাবে চূড়ান্ত সিদ্ধান্ত গ্ৰহণ কৰা হয়। পৰৱৰ্তী সময়ত ২০১৯ চনৰ ৯ ফেব্ৰুৱাৰীত প্ৰধানমন্ত্ৰী নৰেন্দ্ৰ মোদীয়ে হোলোংগীত গ্ৰীনফিল্ড বিমানবন্দৰ নিৰ্মাণৰ আধাৰশিলা স্থাপন কৰে।
ইতিমধ্যে অক্টোবৰ মাহত বিমানবন্দৰত বিমান সেৱা কোম্পানী “ইণ্ডিগ”য়ে ১৮০ খন আসনযুক্ত “এ ৩২০” শ্ৰেণীৰ বিমানৰ সফলতাৰে অৱতৰণ কার্য সম্পূৰ্ণ কৰিছে। প্ৰায় ৬৪৫ কৌটি টকা ব্যয়ৰে ৬৯৪ ,একৰ মাটিত নিৰ্মাণ কৰা বিমানবন্দৰটোৰ ৰাণৱেৰ দৈৰ্ঘ্য হৈছে ২,৩০০ মিটাৰ। তেনেদৰে যাত্ৰীৰ সুবিধাৰ বাবে উন্নত মানৰ টাৰ্মিনেল বিল্ডিং, পাৰ্কিং, বিমান নিয়ন্ত্ৰণ কক্ষ আদি নিৰ্মাণ কৰা হৈছে। বিমানবন্দৰটোৰ পৰা বিমান সেৱা আৰম্ভ হলে অৰুণাচল প্ৰদেশৰ ৰাজধানী চহৰ ইটানগৰৰ সৈতে দেশৰ আন প্ৰান্তৰ পোনপটীয়াকৈ বিমান সংযোগ আৰম্ভ হোৱাৰ লগতে বায়ু যাতায়তৰ ক্ষেত্ৰত এক নতুন দিগন্তৰ সূচনা আৰম্ভ হব। সমান্তৰালভাৱে উপকৃত হব বিশ্বনাথ, লখিমপুৰকে ধৰি উত্তৰ অসমৰ কেবাখনো জিলাৰ ৰাইজ। কিয়নো অসমৰ সীমান্তৰ গাতে লাগি আছে হোলোংগী বিমানবন্দৰ।
আনহাতে ভাৰতীয় বিমানবন্দৰ প্ৰাধিকৰণৰ উত্তৰ পূব মণ্ডলৰ ক্ষেত্ৰীয় কাৰ্যবাহী সঞ্চালক সন্মুখ যোগানিয়ে জানিবলৈ দিয়া মতে বিমানবন্দৰটোত সকলো বতৰতে যাতে সুকলমে বিমান চলাচল কৰিব পাৰে তাৰ বাবে বিশেষ ব্যৱস্থা গ্ৰহণ কৰা হৈছে। ইফালে প্ৰধানমন্ত্ৰী নৰেন্দ্ৰ মোদীৰ আগমণ উপলক্ষে বিমানবন্দৰকে ধৰি তাৰ আশে – পাশে কটকটীয়া নিৰাপত্তা বেষ্টনী গঢ়ি তোলা হৈছে। আনকি ভাৰতীয় বিমানবন্দৰ প্ৰাধিকৰণ আৰু অসামৰিক বিমান পৰিবহণ মন্ত্ৰণালয়ৰ কেবাগৰাকী শীৰ্ষ বিষয়াই হোলোংগী বিমানবন্দৰত বাহৰ পাতি প্ৰধানমন্ত্ৰীয়ে যাতে সুকলমে বিমানবন্দৰটো মুকলি কৰিব পাৰে তাৰ চুড়ান্ত ৰূপ দিয়াৰ বাবে চেষ্টা অব্যাহত ৰাখিছে।
