গুৱাহাটীৰ জালুকবাৰীস্থিত অসম বন বিদ্যালয়ত সদৌ অসম বন কৰ্মচাৰী সন্থাৰ ৪২ সংখ্যক দ্বি-বাৰ্ষিক অধিবেশনৰ ১৮ ডিচেম্বৰত অনুষ্ঠিত মুকলি সভাত উপস্থিত থাকি মন্ত্ৰী পাটোৱাৰীয়ে ভাষণ প্ৰসংগত মন্ত্ৰী পাটোৱাৰীয়ে কয় যে-“সম্প্রতি ৰাজ্য চৰকাৰৰ বন বিভাগত বহু পদ খালী হৈ আছে যদিও অতি সোনকালে খালী হৈ থকা পদ সমূহ পূৰণ কৰা হ’ব। ইতিমধ্যে মুখ্যমন্ত্ৰীৰ তৎপৰতাত তৃতীয় বন বাহিনী গঠন কৰাৰ ব্যৱস্থা কৰা হৈছে, যাতে বন বিভাগটো সুৰক্ষিত হৈ থাকিব।
উল্লেখনীয় যে অসম বন কৰ্মচাৰী সন্থাৰ ৪২ সংখ্যক দ্বি-বাৰ্ষিক অধিবেশনখন ১৭ আৰু ১৮ ডিচেম্বৰত দুদিনীয়া কাৰ্যসূচীৰে গুৱাহাটী আঞ্চলিক সমিতিৰ সহযোগত গুৱাহাটীৰ জালুকবাৰীস্থিত অসম বন বিদ্যালয় চৌহদত অনুষ্ঠিত হৈছিল। ১৭ ডিচেম্বৰত বিয়লি ২ বজাত প্ৰতিনিধি শিবিৰ উদ্ধোধনৰে অধিবেশনৰ কাৰ্যসূচীৰ শুভাৰম্ভ কৰে অসম বন কৰ্মচাৰী সন্থাৰ মুখ্য উপদেষ্টা হোমেন পেগুৱে। তাৰ পাছত সন্থাৰ সভাপতি ৰাজেন্দ্ৰ শইকীয়াৰ সভাপতিত্বত কেন্দ্ৰীয় কাৰ্যনিৰ্বাহক সভাখন অনুষ্ঠিত হয়। আনহাতে ১৮ ডিচেম্বৰত পুৱা সন্থাৰ পতাকা উত্তোলন কৰে সন্থাৰ সভাপতি ৰাজেন্দ্ৰ শইকীয়াই আৰু শ্বহীদ তৰ্পণ কৰে সাধাৰণ সম্পাদক পুলিন মহন্তই। ১০ বজাৰ পৰা প্ৰতিনিধি আৰু বিষয় বাচনি সভা অনুষ্ঠিত হয়। বিয়লি ৪ বজাৰ পৰা অনুষ্ঠিত মুকলি সভাত মুখ্য অতিথি হিচাপে ভাগ লৈ সন্থাৰ মুখপাত্ৰ ‘বনজ্যোতি’ উন্মোচন কৰে অসম চৰকাৰৰ বন আৰু পৰিবেশ বিভাগৰ মন্ত্ৰী চন্দ্ৰমোহন পাটোৱাৰীয়ে।
আনহাতে সভাত সন্মানীয় অতিথি হিচাপে অসম চৰকাৰৰ বন বাহিনীৰ মুৰব্বী আৰু প্ৰধান মুখ্য বন সংৰক্ষক মহেন্দ্ৰ কুমাৰ যাদৱ , বিশিষ্ট অতিথি হিচাপে সদৌ অসম কৰ্মচাৰী পৰিষদৰ মুখ্য উপদেষ্টা বাসব কলিতা উপস্থিত থাকে। আমন্ত্ৰিত অতিথি হিচাপে অসম চৰকাৰৰ শীৰ্ষ বন বিষয়া ক্ৰমে বিনয় গুপ্তা , বিপিন কুমাৰ বাঞ্চাল, ডঃ চি মুথু কুমাৰৱেল, ভাস্কৰ ডেকা আৰু জয়ন্ত গোস্বামী উপস্থিত থাকে। সন্ধিয়া ৭ বজাত বন্তি প্ৰজ্বলন কৰে পশ্চিম কামৰূপ বন সংমণ্ডলৰ ডি এফ অ’ ডিম্পী বৰাই আৰু সাংস্কৃতিক অনুষ্ঠান মুকলি কৰে পূব কামৰূপ বন সংমণ্ডলৰ ডি এফ অ’ ৰোহিণী বল্লভ শইকীয়াই। অনুষ্ঠানত তিনি গৰাকী বিশিষ্ট শিল্পী ক্ৰমে – বিহু গীতৰ সম্ৰাট খগেন গগৈ, অসম বিহু সংস্থাৰ সভাপতি দ্বীপজ্যোতি হাজৰিকা আৰু যুৱ কণ্ঠ শিল্পী হিমাংশু জান শৰ্মাক আনুষ্ঠানিক ভাৱে সম্বৰ্ধনা জনোৱা হয়।