অসমকে ধৰি উত্তৰ পূৱৰ দুৱাৰমুখ স্বৰূপ গুৱাহাটী মহানগৰীক স্মাৰ্ট চিটিৰূপে গঢ় দিয়াৰ বাবে নানা উন্নয়নমূলক কাম চৰকাৰে হাতত লৈছে। স্মাৰ্ট চিটি গঢ় দিয়াৰ নামত জাইকা, পাৱাৰগ্ৰীড, শক্তি বিভাগ, জনস্বাস্থ্য কাৰিকৰী বিভাগ, আই টি এম এছ, গুৱাহাটী স্মাৰ্ট চিটি লিমিটেড, বি এছ এন এল, পূৰ্ব ভাৰতী গেছ প্ৰাইভেট লিমিটেডকে ধৰি বিভিন্ন চৰকাৰী – বেচৰকাৰী সংস্থাই গুৱাহাটী মহানগৰীৰ কেবাটাও স্থানত উন্নয়নমূলক কাম – কাজ সম্পন্ন কৰাৰ বাবে অসম চৰকাৰৰ লোকনির্মাণ পথ বিভাগে নিৰ্মাণ কৰা পথ সমূহ খন্দাৰ কাম কৰি আহিছে।
লোকনির্মাণ বিভাগৰ উচ্চস্তৰীয় সূত্ৰই সদৰি কৰা অনুসৰি পথৰ মাটি খন্দাকে ধৰি উন্নয়নমূলক কাম – কাজ কৰাৰ বাবে সেই সংস্থা বা কৰ্তৃপক্ষ সমূহে যাৱতীয় নীতি – নিয়মৰ মাজেৰে অনুমতি লয়। অনুমতি দিয়াৰ সময়ত লোকনির্মাণ বিভাগৰ ফালৰ পৰা তেওঁলোকক কিমান দিনৰ ভিতৰত কাম সম্পূৰ্ণ কৰিব লাগিব , ধ্বংস কৰা অংশ আগৰ দৰে নতুনকৈ নিৰ্মাণ কৰা, কাম চলি থকা সময়ত ৰাইজৰ অসুবিধা লাঘৱ কৰাকে ধৰি বিভিন্ন চৰ্ত আৰোপ কৰা হয়। কিন্তু কেবাটাও সংস্থাই বিভিন্ন কাৰণত চৰ্ত অনুসৰি নিৰ্ধাৰিত সময়ৰ ভিতৰত কাম সম্পন্ন কৰিব নোৱাৰাৰ বাবে ৰাইজে যাতায়তৰ ক্ষেত্ৰত জীয়াতু ভুগিব লগা হৈছে। বিশেষকৈ জি এছ ৰোডৰ খানাপাৰাৰ হোটেল তাজ ভিভাণ্টৰ সন্মুখত মাজে মাজে বোকা পানীৰে উপচি থকাটো তেনেই সাধাৰণ ঘটনাত পৰিণত হৈছে। তাত পূৰ্ৱ ভাৰতী গেছ প্ৰাইভেট লিমিটেডে ঘৰে ঘৰে গেছ যোগানৰ বাবে কৰি আছে মাটি খান্দি পাইপ বহুওৱা কাম। কিন্ত কাম সমূহ কৰাৰ সময়ত যাবতীয় ব্যৱস্থা গ্ৰহণ নকৰা বাবে পদপথ সহিতে পথৰ এক বৃহৎ অংশ বোকাময় হোৱাত পথচাৰীৰ আহ – যাহত ব্যাঘাত জন্মিছে। তেনেদৰে গণেশগুৰীৰ গণেশ মন্দিৰ পৰা কাহিলীপৰা সংযোগী পথ, ভঙাগড় উৰণীয়া সেতুৰ পৰা ৰাজগড় সংযোগী পথকে ধৰি কেবাটাও পথত তেনেকৈ মাটি খান্দি কৰা দুৰৱস্থাৰ বাবে জীয়াতু ভূগিবলগীয়া হৈছে সাধাৰণ পথচাৰী। ব্লকেৰে সজোৱা পথছোৱাৰ মাজে-মাজে ব্লক নোহোৱাৰ ফলত সৃষ্টি হোৱা গাঁতৰ ফলত কেইবাটাও সৰু-বৰ দুৰ্ঘটনাও সংঘটিত হৈছে।
কেইবাখনো শিক্ষানুষ্ঠান, অগ্রণী প্রতিষ্ঠান থকা বাণিজ্যিক ক্ষেত্ৰ এই ৰাজগড় – ভঙাগড় সংযোগী পথছোৱাৰেই গুৱাহাটী মেডিকেল কলেজ হাস্পতাললৈও নিতৌ ৰোগী কঢ়িওৱা এম্বুলেঞ্চ চলাচল কৰে। ৰাধাগোবিন্দ বৰুৱা পথত জু- ৰোডত নিৰ্মাণ চলি থকা উৰণীয়া সেতুৰ বাবে এতিয়া প্ৰায়সংখ্যক যাতায়াতকাৰীয়েই বিকল্প পথ হিচাপে লয় গুৱাহাটীৰ অন্যতম মুখ্য স্থান হিচাপে বিবেচিত এই ৰাজগড়-ভঙাগড় সংযোগী পথ। বিশেষকৈ বিহুতলীত নলাৰ পানী ৰাজ পথত জমা হৈ যোৱাৰ ফলত কদৰ্যময় হৈ পৰিছে উক্ত অংশ। আনহাতে যান-জঁট নিয়ন্ত্ৰণৰ বাবে গুৱাহাটীৰ বিভিন্ন গুৰুত্বপূৰ্ণ স্থানত চলি আছে আই টি এম এছৰ অধীনত স্বয়ংক্ৰিয় লাইট। এই লাইটলৈ বিদ্যুৎ সংযোগ দিয়াৰ বাবেও বহু স্থানত পথ খন্দা হৈছে। যাৰ বাবে গুৱাহাটীৰ সচেতন নাগৰিক সকলে লোকনির্মাণ পথ বিভাগৰ উৰ্ধতম কৰ্তৃপক্ষক বিভাগীয় চৰ্ত ভংগ কৰি পথ ধ্বংস কৰা চৰকাৰী – বেচৰকাৰী সংস্থা সমূহৰ বিৰুদ্ধে কঠোৰ ব্যৱস্থা গ্ৰহণ কৰিবলৈ দাবী জনাইছে।
